ڕۆژی چوارشەممە ١٩ی جۆزەردان، هاووڵاتییەکی کورد بە ناوی "جەعفەر حەسەن‌پوور"، تەمەن ٤٢ ساڵ، کوڕی سەدیق، خەڵکی گوندی "کانی ڕەش" و دانیشتووی شنۆ، پاش بانگهێشتکردنی بۆ ئیدارەی ئیتلاعاتی سپا دەسبەسەر کرا.
ڕۆژی چوارشەممە ١٩ی جۆزەردان، عوسمان ئیسماعیلی و مەحموود ساڵحی، دوو چالاکی کرێکاریی خەڵکی سەقز، لە زیندانی ئەو شارە ئازاد کران.
ئەمڕۆ چوارشەممە ١٩ی جۆزەردان، ڤیان محەممەدی، چالاکی مەدەنی و خوێندکاری خەڵکی شاری مەریوان بە دانانی بارمتە لە زیندانی ناوەندیی ورمێ، ئازاد کرا.
حوکمی چوار ساڵ زیندانیی تەعزیریی فەرهاد محەممەدی، پارێزەری پلە یەکی دادگوستەری لە لقی ٤ی دادگای پێداچوونەوەی سنە، بۆ ١٠ مانگ زیندان کەم کرایەوە.
ڕۆژی سێشەممە ١٨ی جۆزەردان، هاووڵاتییەکی کورد بە ناوی "زاهیر پەس و پیش (جۆڵا)"، خەڵکی گوندی "چیانە" سەر بە پیرانشار، بە دانانی بارمتە لە گرتنگەی ئیدارەی ئیتلاعاتی ئەو شارە ئازاد کرا.
ڕۆژی سیشەممە ١٨ی جۆزەردان، تەرمی سووتاوی ژنێکی لاو بە ناوی "گوڵاڵە شێخی"، کچی عوسمان و خەڵکی سەقز کە بەدەستی دەستگیرانەکەی کوژرابوو، لە تەنیشت جادەی سەقز ــ سنە سەرەوەتر لە گوندی "چاپانی خوارەوە"، لەلایەن مەئموورانی ئاگاهی دۆزرایەوە.
ڕۆژی دووشەممە ١٧ی جۆزەردان، هاووڵاتییەکی کورد بە ناوی "زاهیر پەس و پیش (جۆڵا)"، خەڵکی گوندی "چیانە" سەر بە پیرانشار، پاش بانگهێشتکردنی بۆ ئیدارەی ئیتلاعاتی ئەو شارە دەسبەسەر کرا.
ڕۆژی دووشەممە ١٧ی جۆزەردان، بەرزان محەممەدی، زیندانیی سیاسیی پێشوو، خەڵکی شاری سەوڵاوا، لەلایەن هێزە ئەمنییەتییەکانەوە دەسبەسەر کرا.
ڕۆژی دووشەممە ١٧ی جۆزەردان، شێرکۆ ئاگووشی، زیندانیی سیاسیی خەڵکی پیرانشار، بە کۆتایی ماوەی مەرەخەسییەکەی گەڕایەوە بۆ زیندانی نەغەدە.
ڕۆژی شەممە ١٥ی جۆزەردان، کۆڵبەرێک بە ناوی "یووسف فەرجامی"، تەمەن ١٨ ساڵ، کوڕی ئیبراهیم و خەڵکی گوندی "دێم‌قشڵاخ" سەر بە ماکۆ، لە ئەنجامی تەقەی هێزەکانی ئەرتشی تورکیە بە توندی بریندار بووە.
ئاژانسی هەواڵدەریی کوردپا
