ڕۆژی سێشەممە ١٢ی بانەمەڕ، کەیوان زەندکەریمی، هاووڵاتیی خەڵکی سنە پاش ١٢٥ ڕۆژ دەسبەسەرکرانی کاتی بە دانانی بارمتەی ٣ میلیارد تمەنی بە شێوەی کاتی و تا کۆتاییهاتنی قۆناغەکانی دادڕەسی لە زیندانی سنە ئازاد کرا.
ڕۆژی دووشەممە ١١ی بانەمەڕ، کۆڵبەرێک بە ناوی "غوڵام مەحموودیان" خەڵکی سەلاسی باوەجانی بە تەقەی هێزە نیزامییەکانی حکوومەت لە سنووری "کلەبەر"ی نەوسوود بریندار بوو.
مامۆستا سابیر خودامورادی، پێشنوێژی شارەکی قەوخی سەقز لەلایەن دادگای تایبەتی ڕۆحانییەتی هەمەدانەوە بە ٧ مانگ و نیو زیندانی تەعلیقی و لێدانی تەعلیقیی ٧٤ قامچی بۆ ماوەی سێ ساڵ مەحکووم کراوە.
ڕۆژی دووشەممە ١١ی بانەمەڕ، سوهەیلا حیجاب، زیندانیی سیاسی لە زیندانی کرماشان ئازاد کرا.
عەلی گوڵمحەممەدی، هاووڵاتیی خەڵکی بۆکان لەلایەن لقی ١٠١ی دادگای کەیفەری ٢ی ئەم شارەوە بە ٣٢ مانگ زیندان مەحکووم کرا.
ڕۆژی دووشەممە ١١ی بانەمەڕ، ئومید ئەسەدی، چالاکی کرێکاری بانگهێشتی ئیدارەی ئیتلاعاتی سنە کرا و لێپرسینەوەی لێ کرا.
مەسعوود دارسەنج، هاووڵاتیی خەڵكی بۆکان لەلایەن لقی ١٠١ی دادگای کەیفەری ٢ی ئەم شارە بە ٣٣ مانگ زیندان مەحکووم کرا.
فەرزاد مەحموودپوور، هاووڵاتیی خەڵکی شنۆ سەرەڕای تێپەڕبوونی ٧ مانگ لە دەسبەسەرکرانی، هێشتا لە زیندانی ورمێ دەسبەسەرە و چارەنووسی ناڕوونە.
منداڵێکی ١٦ ساڵە بە ناوی "ئێحسان محەممەدی" کوڕی ئیبراهیم و مریەم خەڵکی ئەمیرئابادی شنۆ لە کانوونی ئێسڵاح و تەربییەتی ورمێدایە و چارەنووسی ناڕوونە.
لە ڕەوتی بزووتنەوەی ژن، ژیان، ئازادیدا، چوار هاووڵاتیی ناڕازی بە تەقەی هێزە سەرکوتکەرەکان گیانیان لەدەست دا و ژمارەیەکیش بریندار بوون.
ئاژانسی هەواڵدەریی کوردپا
