کۆنسێرتی \"شەوی ماملێ\" لە مەهاباد پێشی‌پێگیرا

ئاژانسی کوردپا: بەهۆکارێکی نادیار چالاکیی هونەریی دوو گرووپی موسیقی لە شاری مەهاباد هەڵوەشاوە ڕاگەیەندرا.

بەپێی هەواڵی گەیشتوو بە ئاژانسی هەواڵدەریی کوردپا، ئێوارە درەنگانی ڕۆژی پێنج‌شەممە ٩ی بەفرانبار، کۆنسێرتی عەبدوڵڵا ماملێ کوڕی هونەرمەندی مەزن محەممەدی ماملێ هەڵوەشایەوە.

ئەو بڕیارە، چەند ساتێک بەر لە دەستپێکی کۆنسێرتەکە لە تالاری \"وەحدەت\" دراوە.

سەرچاوەکانی هەواڵ باس لەوە دەکەن کە؛ هێزە لیباس شەخسییەکان بە بەڕێوەبەرانی ئەو کۆنسێرتەیان وتووە کە؛ سەرەڕای مۆڵەتی یاسایی پێدراو لە لایەن ئیدارەی فەرهەنگ و ئیرشادی مەهاباد، نابێ گۆرانی پێشکەش بکەن.

ئەو کۆنسێرتە بڕیار بوو لەژێر ناوی \"شەوی ماملێ\" و بە هاوکاریی دامەزراوەی فەرهەنگیی \"تۆرەنج\" و گرووپی مووزیکی \"کەویار\"ـی سنە بەڕێوە بچێت.

تاکوو ئێستا چەندین کۆنسێرتی هونەرمەندانی کورد لەوانە شارام نازری، کەیهان کەلهۆڕ، کامکارەکان و... بە هۆکارگەلی جیاجیا هەڵوەشاونەتەوە.

کەسایەتییە توندڕەوەکانی نێو دەسەڵاتی ئێران و لەوانە پێشنوێژەکان هەمیشە دژی ئەو جۆرە چالاکییە هونەرییانە بوون و بە تێکدەری ئەخلاقی کۆمەڵایەتیی خەڵکیان لەقەڵەم داون.