لە داڵاهۆ ژنێک بە دەستی مێردەکەی کوژرا
ڕۆژی دووشەممە ٢٣ی سەرماوەز لە تۆڕە کۆمەڵایەتییەکاندا هەواڵێک سەبارەت بە کوژرانی ژنێک لەلایەن مێردەکەیەوە لە شاری داڵاهۆ بڵاو بووەوە.
سەرچاوەیەکی ئاگادار بە ئاژانسی کوردپای ڕاگەیاند کە ئەو ڕووداوە پێشتر و لە چەند مانگی ڕابردوودا بەم شێوەیە بڵاو بووەوە کە ژنێک بە ناوی "مریەم جەعفەری" تەمەن ٢٦ ساڵ، لە ڕێگای خواردنی "حەبـ"ـەوە کۆتایی بە ژیانی خۆی هێناوە.
ئەو سەرچاوەیە زیادی کرد: "لە لێکۆڵینەوەی سەرەتای ئەو ڕووداوە، گیانلەدەستدانی ئەو ژنە بە خواردنی حەب ڕاگەیەندرا، بەڵام پاش ئەو ڕووداوە مێردی ئەو ژنە لاوە خۆی دەشارێتەوە. پۆلیس بەهۆی گوماناویبوونی خۆکوژیی ئەو ژنە و خۆشاردنەوەی مێردەکەی، پاش لێکۆڵینەوە و بەدواداچوون، حەوتووی ڕابردوو مێردی ئەو ژنە دەسبەسەر کرا و بکوژەکە دانی بە تاوانەکەیدا نا کە بەهۆی کێشەی بنەماڵەییەوە، بە ئازار و لێدان بووەتە هۆی گیانلەدەستدانی هاوژینەکەی".
سەرچاوەی کوردپا هەروەها وتی: "مێردی ئەو ژنە لە یەکێک لە ڕێستورانتەکانی شاری داڵاهۆ خەریکی کار بووە".
