كڕینی كەلوپەلی بیانی لە زانكۆی ئازادی ئیسلامی قەدەغە كرا

كوردپا: جێگری ئیداری و ماڵیی زانكۆی ئازادی ئیسلامیی حكوومەتی ئێران رایگەیاند، كڕینی هەرچەشنە كەلوپەلێكی بیانی بۆ راپەڕاندنی كاری زانكۆ قەدەغەیە.

محەممەد خوجەستە وتیشی: ئەو بڕیارە سەرجەم كەرتەكانی زانكۆ و ناوەندە فێركارییەكانی سەر بە زانكۆی ئازادی ئیسلامیی لەخۆ دەگرێت.

هەواڵدەریی ئیسنا بڵاوی كردەوە، لە بەیاننامەی زانكۆی ئازاددا هاتووە، بە حوكمی ئەوەی ئەمساڵ بەناوی ساڵی \"بەرهەمهێنانی میللی، پشتیوانی لە كار و سەرمایەی ئێرانی\" ناودێر كراوە، پێویستە سەرجەم كەلوپەلەكانی زانكۆ لە درووست كراوەكانی ناوخۆی ئێران بێت.

خوجەستە ئەوەشی خستە روو، سەرجەم كەلوپەلەكانی \"ئامووزشی، پەروەردەیی، عومرانی، تاقیگە و كارگەیی\" دەبێ‌لە بەرهەمەكانی ناوخۆی حكوومەتی ئیسلامیی ئێران بن.

شارەزایانی سیاسی و ئابووری لەو باوەڕە دان لە حكوومەتی ئیسلامیی ئێراندا بەرهەمێكی ئەوتۆ بوونی نیە و ناودێڕ كردنی ئەمساڵ بەناوە تەنیا شتێكی سیمبۆلیكە.