وەرزشوانێکی بۆکانی لەلایەن هێزە ئەمنییەتییەکانەوە دەسبەسەر کرا
ڕۆژی یەکشەممە ٢٦ی گەلاوێژ، وەرزشوانێکی کورد بە ناوی "واحید ئیبراهیمیان" کوڕی "محەممەدئەمین"، خەڵکی شاری بۆکان، لەلایەن هێزە ئەمنییەتییەکانەوە دەسبەسەر کرا و بۆ شوێنێکی نادیار ڕاگوێزرا.
هێزە ئەمنییەتییەکان بەبێ بەڵگەی دادوەری هێرشیان کردووەتە سەر ماڵی ئەو هاووڵاتییە کوردە و دواتر ناوبراویان دەسبەسەر کردووە.
هەروەها هێزە ئەمنییەتییەکان پاش پشکنینی ماڵی ئەو هاووڵاتییە، دەستیان بەسەر هەندێک کەرەستەی کەسیی ئەو وەرزشوانەدا گرتووە و لەگەڵ خۆیان بردوویانە.
هەتا ئێستا بەدواداچوونی بنەماڵەی ئەو هاووڵاتییە بۆ ئاگاداربوون لە چارەنووسی کوڕەکەیان بێئاکام ماوەتەوە و هێزە ئەمنییەتییەکان لە دانی هەر جۆرە زانیارییەک لەو پەیوەندییەدا خۆیان دەبوێرن.
هەتا کاتی بڵاوبوونەوەی ئەم هەواڵە، لە هۆکاری دەسبەسەری و تۆمەتی وەپاڵدراوی ئەو وەرزشوانە هیچ زانیارییەک لەبەر دەستدا نییە.
"واحید ئیبراهیمیان" لە ڕشتەی کیک بوکسینگ چالاکی دەکات و هەتا ئێستا چەندین خەڵاتی قارەمانیەتیی بەدەست هێناوە.
ناوبراو خێزاندار و خاوەنی دوو منداڵە.
