مەهاباد؛ هاووڵاتییەک بە دانانی بارمتە بە شێوەی کاتی ئازاد کرا

ڕۆژی دووشەممە ٢٨ی پووشپەڕ، هاووڵاتییەکی کورد بە ناوی "قاسم عەزیزییان"، تەمەن ٢٨ ساڵ، کوڕی ڕەسووڵ و خەڵکی گوندی "لەج" سەر بە مەهاباد، بە دانانی بارمتە لە زیندانی ئەو شارەدا ئازاد کراوە.

ئەو هاووڵاتییە، بە دانانی بارمتە بە شێوەی کاتی هەتا کاتی دادگاییەکەی لە زیندانی مەهاباد ئازاد کراوە.

ڕۆژی هەینی ٣١ی بانەمەڕ، قاسم عەزیزییان بەبێ بەڵگەی یاسایی لەلایەن هێزە ئەمنییەتییەکانەوە دەسبەسەر کرابوو و پاش کۆتایی لێپرسینەوە بۆ زیندانی مەهاباد ڕاگوێزرابوو.

هێزە ئەمنییەتییەکان ئەو هاووڵاتییەیان بە "هاوکاری لەگەڵ یەکێک لە حیزبە کوردییەکانی ئۆپۆزیسیۆنی حکوومەتی ئێران"، تۆمەتبار کردووە.