لە ئێران 30%ی گرووپ تەمەنیی 17 هەتا 30 ساڵ بێكارن

21:34 - 20 جۆزەردان 2712
كوردپا: كارناسێكی ئابووری رایگەیاند، لە ئێران بەهۆی رەچاوكردنی سیاسەتی هەڵەی ئابووری، نرخی چوونەسەری گەشەی ئابووری دیسان دابەزیوە و 30%ی گرووپی تەمەنیی 17 هەتا 30 ساڵ بێكارن.

دوكتور مەحموود جامساز لە لێدوانێكدا لەگەڵ هەواڵدەریی كاری ئێران، (ئیلنا) ئاماری دەوڵەتی، واتە رەخساندنی یەك میلیۆن و 600 هەزار پیشە لە ماوەی یەك ساڵی رابردووی بە ناتەبا لەگەڵ نرخی گەشەی ئابووری لە قەڵەم دا و وتی: \"نرخی گەشەی ئابووریی 1% نەتەنیا لە بواری ئابوورییەوە، نرخی بێكاری كەم نەبۆتەوە، بەڵكوو زیادیش بووە، چونكە بەپێی پێوەرە ئابوورییەكان دەبێ‌نرخی گەشەی ئابووری بگاتە 8%، ئەوكات دەرەتانی هەلی كار دەڕەخسێت\".

ئەو كارناسە ئابووریە گەردانكردنی باو لە سیستمی بانكیی بە هۆكاری هەڵەی سیاسەتی رەخساندنی هەلی كاری دەوڵەت راگەیاند و وتی: \"ئێستا متمانەكان گرینگ نین و زۆربەی بانكەكانیش لەراستای گرێبەستی هاوبەش و گرووپیدا چالاكی دەكەن و هەر ئەمەش بۆتە هۆی ئەوەی كە زیاتر لە رابردوو نرخی بێكاری لە ئێران پەرە بستێنێ‌\".

جامساز، بە ئاماژە بەوەی كە لە نێوان هەر پێنج بنەماڵە، سێ‌بنەماڵە بێكاری تێدایە، رایگەیاند: \" لە ماوەی یەك ساڵی رابردوودا بەهۆی نەبوونی نەدانی یارانەكان، زۆرێك لە كەرتەكانی كار و ناوەندەكانی وەبەرهێنان كۆمەڵێكی بەرچاو لە كرێكارانیان لە كار دەركردووە و رەوتی گەشەی هەلی كار بە ئاراستەی نەرێنیدا رۆیشتووە. كە وایە دەوڵەت ناتوانێ‌ئیدیعای رەخساندنی یەك میلیۆن و 600 هەزار دەرفەتی كاری رەخساندبێت\".

چوونە سەرێی رۆژ لە دوای رۆژی نرخی بێكاری لە ئێران كاتێك دایە كە نرخی شتۆمەك، خۆراك و پێداویستییە سەرتاییەكانی خەڵك لە بەرەبەری جێبەجێ‌كردنی قۆناغی دووەمی ئامانجدار كردنی یارانەكاندا بە شێوەیەكی بەرچاو زیادیان كردووە و ژیانی خەڵك بە دژواری بەڕێوە دەچێت.