زیندانی دێزڵاوای کرماشان؛ زیندانییەک بۆ ڕزگاری لە ئێعدام پێویستیی بە یارمەتیی ماڵی هەیە
زیندانییەک بە ناوی "بەختیار سەحرایی"، خەڵکی جوانڕۆ لە زیندانی دێزڵاوای کرماشان بۆ ڕزگاری لە ئێعدام پێویستیی بە یارمەتیی ماڵی هەیە.
یەکێک لە نزیکانی ئەو زیندانییە لەم بارەیەوە بە کوردپای ڕاگەیاندووە: "ئەو هاووڵاتییە ساڵی ٩٥ی هەتاوی لە ڕەوتی شەڕ و تێکهەڵچوونێک لەنێوان بنەماڵەی هاوسەرەکەی و خزمەکانی خۆی، بۆ نێوبژیوانی چووەتە هاواریانەوە و لەو شەڕەدا یەک کەس کوژراوە و بەختیار سەحرایی بە تۆمەتی "کوشتنی بەئەنقەست" بە ئێعدام (قیساس) مەحکووم کراوە.
ئەو سەرچاوە هەروەها وتوویەتی: "پاش ئەو ڕووداوە، هاوسەری سەحرایی دەستی داوەتە خۆکوژی و کۆتایی بە ژیانی خۆی هێناوە".
ئەو سەرچاوەیە ئەوەشی خستە ڕوو کە سەرەتا بنەماڵەی کوژراوەکە بۆ لێخۆشبوونی ئەو زیندانییە داوای ٤ میلیارد تمەنیان کردبوو و هەنووکە داوای ٢ میلیارد تمەن دەکەن.
بەختیار سەحرایی لە ساڵی ٩٥ی هەتاوییەوە هەتاکوو ئێستا، لە زیندانی دێزڵاوای کرماشانە.
