دماوەند؛ هێرشی سەرەڕۆیانە، دۆسییەسازی و قەدەغەکردنی چوونەدەروەی ١٦ کرێکار/ بەردەوامیی دەسبەسەرکران و ناوونیی چارەنووسی فەرزاد ڕۆستەمی
٣ی سەرماوەزی ١٤٠٤؛ لە ماوەی چەند مانگی ڕابردوودا، ١٦ هاووڵاتیی خەڵکی ناوچەی ژاوەرۆی سنە و دانیشتووی شاری دەماوەند کە هەموویان خەریکی کرێکاری بوون، بەرەوڕووی هێرشی سەرەڕۆیانەی هێزەکانی ئیتلاعاتی دەماوەند بۆ سەر ماڵەکانیان، بانگکرانی بەردەوام، لێپرسینەوەی درێژماوە، دەستداگرتنی نایاسایی بەسەر کەلوپەلە کەسییەکانیان و چەند جۆر گوشاری ئەمنییەتی بوونەتەوە. یەکێک لەم هاووڵاتییانە بە ناوی فەرزاد ڕۆستەمی پاش دوو مانگ دەسبەسەرکرانی سەرەڕۆیانە، ئێستا زیاتر لە سێ مانگە و سەرجەم ١١٣ ڕۆژە کە لە دۆخێکی ناڕووندا لە بەندیخانەی دەماوەند ڕاگیراوە.
ئەم ڕاپۆرتە کە بەپێی زانیارییەکانی سەرچاوەیەکی ئاگادار ئامادە کراوە، دەپەرژێتە سەر دۆسییەسازییە ئەمنییەتییەکان دژی ١٦ هاووڵاتیی کورد بە تۆمەتەکانی "پڕوپاگەندە دژی نیزام" و "هەوڵدان دژی تەنایی نەتەوەیی"؛ ڕەوتێک کە لە چوارچێوەی سەرکوتی گرووپیی هاووڵاتییانی کورد کە لە دەماوەند کار دەکەن ڕووی داوە و هەڕەشە، بانگکردن، گوشار و دەستداگرتنی بەردەوام بەسەر کەلوپەلە کەسییەکانیانی لەگەڵ بووە.
بە وتەی سەرچاوەیەکی ئاگاداری کوردپا؛ پاش شەڕی ١٢ ڕۆژەی نێوان ئیسرائیل و ڕێژیمی ئێران و دەسپێکی شەپۆلی سەرکوت، دەسبەسەرکرانی بەربڵاو و دۆسییەسازیی ئەمنییەتی، لە ڕێکەوتی ١٣ی گەلاوێژی ١٤٠٤دا هێزە ئەمنییەتییەکانی ئیتلاعاتی دەماوەند لە کاتژمێر ٢ هەتا ٤ی سەرلەبەیانی بە هێرشی هاوکات بۆ سەر ماڵی ١٦ هاووڵاتی، بە بێ بەڵگەیی یاسایی دەستیان بەسەر مۆبایلەکان، لەپتاب و باقی کەلوپەلە کەسییەکانیاندا گرتووە و بوونەتە هۆی ترس و دڵەڕاوکێی ئەندامانی بنەماڵەکانیان.
لە درێژەدا، هەرکام لەم هاووڵاتییانە بە جیا بانگ کراون و بۆ ماوەی ١٢ هەتا ١٦ کاتژمێر لێپرسینەوەیان لێ کراوە. لەم نێوانەدا فەرزاد ڕۆستەمی پاش هێرشی هێزە ئەمنییەتییەکان دەسبەسەر کراوە و بۆ ماوەی دوو مانگ لە ژووری تاکەکەسیی ئیتلاعاتی دەماوەنددا لێپرسینەوەی لێ کراوە و دواتر بۆ بەندیخانەی دەماوەند ڕاگوێزراوە؛ جێگایەک کە تاکوو ئێستا بە بێ دەستڕاگەیشتن بە ڕەوتی دادوەری دادپەروەرانە تێیدا ڕاگیراوە.
ئەم سەرچاوەیە جەختی کردەوە کە کەلوپەلی کەسیی ئەم ١٦ کەسە دەستیان بەسەردا گیراوە و هیشتا لە لای ناوەندە ئەمنییەتییەکانن. ئەم کەسانە ئێستا لەگەڵ تۆمەتی نادیاری ئەمنییەتیی وەک "پڕوپاگەندە دژی نیزام" و "هەوڵدان دژی تەنایی نەتەوەیی" بەرەوڕوون.
شوناسی ئەم هاووڵاتییانە بریتییە لە:
١ـ فەرزاد ڕۆستەمی
٢ـ سەعید حەیدەرزاده
٣ـ عیسا خادمی
٤ـ مێهدی قاسمی
٥ـ لوقمان قاسمی
٦ـ شاهۆ قاسمی
٧ـ کەیوان قاسمی
٨ـ فەرزین ڕۆستەمی
٩ـ بێهزاد ڕۆستەمی
١٠ـ فەرزاد شەریفی
١١ـ ئێقباڵ مورادی‌زەڕ
١٢ـ جەلال محەممەدی،
١٣ـ فەرشاد مەلک‌دوخت
١٤ـ جەمیل سێفیدی
١٥ـ شاپوور حەبیبی
١٦ـ فاتح مەحموودی
ئامادەکردن؛ ئەوین مستەفازادە
