بەردەوامیی دەسبەسەرکران؛ ناڕوونیی چارەنووسی ڕامین محەممەدی و محەممەد دەشتی درێژەی هەیە
٣ی سەرماوەزی ١٤٠٤؛ دوو هاووڵاتی بە ناوەکانی "رامین محەممەدی" و"محەممەد دەشتی" خەڵکی گوندی "ئەڵک" سەر بە شاری کامێران، هێشتا دەسبەسەرن و تاکوو ئێستا سەبارەت بە چارەنووس و شوێنی ڕاگیرانیان زانیارییەک لەبەر دەستدا نییە.
بە وتەی سەرچاوەیەکی ئاگاداری کوردپا، ئەم دوو هاووڵاتییە لە کاتی دەسبەسەرکرانیانەوە تاکوو ئێستا لە دەستپێڕاگەیشتن بە پارێزەر و چاوپێکەوتن لەگەڵ بنەماڵەکانیان بێبەری کراون.
ئەم سەرچاوەیە ڕاشیگەیاند: سەرەڕای بەدواداچوونەکانی بنەماڵەی ئەم دوو هاووڵاتییە، هیچ یەک لە ناوەندە ئەمنییەتی و دادوەرییەکان وڵامێکی ڕوونیان سەبارەت بە دۆخیان نەداوەتەوە.
ئەم سەرچاوەیە وتیشی: ناڕوونیی چارەنووسی ئەم دوو هاووڵاتییە زۆربوونەوەی نیگەرانییەکانی بنەماڵە و نزیکەکانی ئەم دوو کەسەیان بەدواوە بووە.
سەرلەبەیانیی ڕۆژی دووشەممە ١٩ی خەزەڵوەری ١٤٠٤، ڕامین محەممەدی و محەممەد دەشتی بە بێ بەڵگەی یاسایی و بە شێوەی توندوتیژانە لەلایەن هێزە ئەمنییەتییەکانەوە دەسبەسەر کران و بۆ شوێنێکی نادیار ڕاگوێزران.
ئەم دوو هاووڵاتییە لە ساڵانی ڕابردووشدا چەندین جار لەلایەن هێزە ئەمنییەتییەکانەوە دەسبەسەر کرابوون.
محەممەد دەشتی تەمەن ٣٣ ساڵ، خێزاندارە و دوو منداڵی هەیە. هەروەها ڕامین محەممەدی تەمەنی ٣٢ ساڵە.
هەتا کاتی بڵاوبوونەوەی ئەم هەواڵە، سەبارەت بە هۆکاری دەسبەسەرکران و تۆمەتە وەپاڵدراوەکان دژی ئەم دوو هاووڵاتییە زانیارییەک لەبەر دەستدا نییە.
