سنە؛ بانگکردن و لێپرسینەوە لە نەسرین کەریمی، لوقمان ئەفزەلی، سەلاح حاجی میرزایی، مەجید کەریمی لە ئەندامانی ئەنجومەنی سێنفیی مامۆستایانی سنە
ڕۆژی پێنجشەممە ٦ی خەرمانانی ١٤٠٤، چوار ئەندامی ئەنجومەنی سێنفیی مامۆستایانی سنە بە ناوەکانی لوقمان ئەفزەلی، سەلاح حاجی میرزایی، مەجید کەریمی و نەسرین کەریمی دوابەدوای بانگەوازی کۆمیتەی خەڵکیی پشتیوانی لە مامۆستایانی سنە، لەلایەن ئیتلاعاتی فەراجاوە بانگ کران و لێپرسینەوە و هەڕەشەیان لێ کرا.
ئەم بانگکردنانە لەکاتێکدایە کە ڕۆژی هەینی ٧ی خەرمانان، هەزاران کەس لە هاووڵتییان و چالاکانی مەدەنیی سنە بە بەڕێوەبردنی شاخەوانییەکی ناڕەزایەتی لە پارکی منداڵەوە بۆ لای گوێزەکوێر، پشتیوانیی خۆیان لە مامۆستایانی دەرکراو دەربڕی.
ئەم شاخەوانی و ڕێپێوانە ناڕەزایەتییە بە دروشم و پلاکاردگەلێکی وەک "مامۆستای ئازادە پشتیوانیت لێ دەکەین" و هاودەنگیی ئەنجومەنە جۆراوجۆرەکان بۆ پشتیوانی لە مامۆستایان و ناڕەزایەتیدەربڕین بە حوکمە نادادپەروەرانەکان دەستی پێ کرد.
ڕۆژی سیشەممە ٤ی خەرمانانی ١٤٠٤، کۆمیتەی خەڵکیی پشتیوانی لە مامۆستایانی دەرکراوی کوردستان بە بڵاوکردنەوەی ڕاگەیەندراوێک بە نیشانەی ناڕەزایەتی بە دەرکردنی سزای قورس و ناداداپەروەرانە دژی ژمارەیەک لە مامۆستایانی دیار و بەشەرەفی کوردستان، کۆمەڵێک هەوڵێکی کردەیی دەست پێ کرد. ئەم کۆمیتەیە ڕایگەیاندبوو کە یەکەمین هەنگاویان ڕێپێوانکی ناڕەزایەتی دژی حوکمە دەرکراوە نادادپەروەرانەکان دژی مامۆستایان لە ڕۆژی ٧ی خەرمانانی ١٤٠٤دا دەبێت.
