محەممەد ئەمینی فەر بۆ تێپەڕاندنی ماوەی زیندانییەکەی ڕەوانەی زیندانی نەغەدە کرا
ڕۆژی چوارشەممە ٨ی ڕەشەممەی ۱٤۰۳، هاووڵاتییەکی کورد بە ناوی "محەممەد ئەمینی فەر (سۆران جۆخور) " خەڵکی گوندی "عەلیاوا"ی شاری نەغەدە پاش بانگهێشتکردنی بۆ لقی جێبەجێکاری سزای کەیفەری دادسەرای گشتیی و ئینقلابی نەغەدە، بۆ تێپەڕاندنی ماوەی زیندانییەکەی، ڕەوانەی زیندانی ئەو شارە، کرا.
پێشتر ئەو هاووڵاتییە لەلایەن لقی یەکی دادگای ئینقلابی مەهابادەوە بە سەرۆکایەتیی دادوەر "سەجاد دووستی" بە تۆمەتی "ئەندامەتی لە یەکێک لە حیزبە کوردستانییەکانی ئۆپۆزسیۆنی حکوومەتی ئێران" و "پروپاگەندە دژی نیزام" بە ٢٩ مانگ بەندکران سزا درابوو.
ڕۆژی دووشەممە، ١١ی بەفرانباری ١٤٠٢، هێزە ئەمنییەتییەکان بە بێ بەڵگەی یاسایی هێرشیان کردە سەر ماڵی ئەم هاووڵاتییە و پاش بێریزیکردن بە ئەندامانی بنەماڵەکەی، ناوبراویان دەسبەسەر کرد.
ئەم هاووڵاتییە کوردە بە مەبەستی لێپرسینەوە ڕەوانەی یەکێک لە گرتنگە ئەمنییەتییەکانی ورمێ کرابوو و پاش کۆتاییهاتنی قۆناغەکانی لێپرسینەوەکەی بە دانانی بارمتەی دوو میلیارد تمەنی لە بەندیخانەی نەغەدە ئازاد کرابوو.
سۆران جۆخور کوڕی فەتاح، لەدایکبووی ٣٠ی خەرمانانی ١٣٦٣ە.
