سەیاد دەرویشی، برای فەرجاد دەرویشی لە گیانلەدەستداوانی بزووتنەوەی ژن، ژیان، ئازادی بە مەبەستی جێبەجێکرانی سزای بەندکران ڕەوانەی بەندیخانەی ورمێ کرا
لە ماوەی ڕۆژانی ڕابردوودا، سەیاد دەرویشی، برای فەرجاد دەرویشی، لە گیانلەدەستداوانی بزووتنەوەی ژن، ژیان، ئازادی پاش بانگکران بۆ بەشی جێبەجێکاری سزاکانی دادسەرای گشتی و ئینقلابی ورمێ، بە مەبەستی جێبەجێکرانی سزای بەندکرانەکەی، بۆ بەندیخانەی ناوەندیی ئەم شارە ڕاگوێزرا.
سەیاد دەرویشی پێشتر لەلایەن دادگای ئینقلابی ورمێوە بە تۆمەتی "پڕوپاگەندە دژی نیزام" بە ٨ مانگ بەندکران سزا درابوو.
ڕۆژی یەکشەممە ١٠ی بەفرانباری ١٤٠٢، سەیاد دەرویشی پاش نزیکەی دوو مانگ بەندکران بە دانانی بارمتەی یەک میلیاردی و بە شێوەی کاتی لە بەندیخانەی ورمێ ئازاد کرا.
ئەم هاووڵاتییە لە ماوەی نزیک بە دوو مانگ دەسبەسەرکران و لێپرسینەوەدا لە ژووری تاکەکەسیی گرتنگەی ئیتلاعاتی ورمێ، بە توندی ئەشکەنجە دراوە و لێپرسینەوەی لێ کراوە.
سەیاد دەرویشی لەو ماوەیەدا لە مافی دەسپێڕاگەیشتن بە پارێزەر و چاوپێکەوتن لەگەڵ بنەماڵەکەی بێبەری بووە.
ناوەڕاستەکانی مانگی خەزەڵوەری ١٤٠٢، هێزە ئەمنییەتییەکان بە بێ بەڵگەی یاسایی سەیاد دەرویشییان لە یەکێک لە شەقامەکانی ورمێ دەسبەسەر کرد و بە مەبەستی لێپرسینەوە بۆ گرتنگەی ئیتلاعاتی ورمێیان ڕاگواست.
شەوی سێشەممە ٢٩ی خەرمانانی ١٤٠١، فەرجاد دەرویشی تەمەن ٢٣ ساڵ و خەڵکی گوندی "بالوو" لە درێژەی بزووتنەوەی ژن، ژیان، ئازادیدا لە شارۆچکەی وەلیعەسری ورمێ بە تەقەی هێزە ئەمنییەتییە سەرکوتکەرەکان گیانی لەدەست دا.
