بەردەوامیی دەسبەسەرکران و ناڕوونیی چارەنووسی سەفا عائێلی، خاڵۆی ژینا_مەهسا ئەمینی
سەرەڕای تێپەربوونی دوو حەفتە لە دەسبەسەرکرانی سەفا عائێلی، خاڵۆی ژینا_مەهسا ئەمینی، هیچ زانیارییەک سەبارەت بە چارەنووس و شوێنی ڕاگیرانی ناوبراو لەبەر دەستدا نییە.
بە وتەی سەرچاوەیەکی ئاگادار، سەفا عائێلی تاکوو ئێستا تەنیا پێوەندییەکی تلفۆنیی کورتی لەگەڵ بنەمالەکەی گرتووە و بە بێ ئاماژەکردن بە شوێنی ڕاگیرانی، ڕایگەیاندووە کە بەدواداچوون بۆ دۆسییەکەی بکەن.
ڕۆژی سێشەممە، ١٤ی خەرمانان، سەفا عائێلی، خاڵۆی ژینا_مەهسا ئەمینی، لەلایەن هێزە ئەمنییەتییەکانەوە دەسبەسەر کرا و بۆ شوێنێکی نادیار ڕاگوێزرا.
هێزە ئەمنییەتییەکان بە بێ بەڵگەی یاسایی هێرشیان کردووەتە سەر ماڵی سەفا عائێلی و ناوبراویان دەسبەسەر کردووە.
ئەم سەرچاوە ئاگادارە ڕایگەیاند: تاکوو ئێستا ڕوون نییە کە کام ناوەند سەفا عائێلیی دەسبەسەر کردووە و بنەماڵەکەی سەبارەت بە شوێنی ڕاگیرانی ناوبراو زانیارییەکیان نییە.
