دوو زیندانیی تۆمەتبار بە "قەتڵ" لە زیندانی کرماشان لەسێدارە دران

ڕێکخراوی مافی مرۆڤی ئێران ڕایگەیاندووە، ڕۆژی دووشەممە ٦ی ڕێبەندان، حوکمی لەسێدارەدانی دوو زیندانیی تۆمەتبار بە "قەتڵ"، بە ناوەکانی "هووشەنگ محەممەدی"، کوڕی نەزەرعەلی و "عەلی ئەنگەزی"، کوڕی میرزاجان، لە زیندانی کرماشان جێبەجێ کراوە.

ئەو ڕێکخراوەی مافی مرۆییە لە زاری سەرچاوەیەکی ئاگادارەوە، لەبارەی دۆسیەی عەلی ئەنگەزی ڕایگەیاندووە: "ناوبراو نزیک ١٥ ساڵ لەمەوبەر بە تۆمەتی "قەتڵ" دەسبەسەر کرابوو".

ڕێکخراوی مافی مرۆڤی ئێران ڕایگەیاندووە کە ئەگەری هەیە ژمارەی ئێعدامکراوان لەو ڕۆژەدا زیاتر لە دوو کەس بن و لەسێدارەدانی ئەم دوو زیندانییە سەرەڕای تێپەڕبوونی نزیک یەک مانگ، لەلایەن میدیاکانی نێوخۆیی ئێران و یان سەرچاوە فەرمییەکان ڕانەگەیەندراوە.