Welatiyekî xelkê Pawe di encama teqeya wezîfedarên hêza Întizamî birîndar bû

Roja Duşemî 27ê Pûşperê, welatiyekî Kurd yê bi navê “Îdirîs Nûrî” xelkê bajarê “Ciwanro”yê di dema revîn ji dest hêzên Întizamî li şeqama “Resalet” a wî bajarî de bi teqeya hêza Întizamî hat birîndarkirin.

Çavkaniyek agehdar di vê derheqê de bi Ajansa Nûçegihaniya “Kurdpa”yê re ragihandiye: “Wezîfedarên Hêza Întizamî bo binçavkirina wî welatiyê Kurd bi sedema sikalaya zewacê êrîşkiribûne ser mala navbirî û hewla veguhastina wî bo girtîgeha bajarê Pawê dabûn.”

Herwisa vê çavkaniya agehdar dibêje: “Ew welatiyê Kurd demakû hewla revînê dabû, ji aliyê yek ji piledarên hêza Întizamî bi bê agehdarkirina berê teqe jê hatibû kirin û di vê bûyerê de navqed û demarên wî birîndar bûye.”

Pêka çavkaniya agehdar, ew welatiyê Kurd piştî birîndarbûnê, ji aliyê wezîfedarên hêza Întizamî bi pêbend û kelemçekirinê bo nexweşxaneya “Taliqanî” a bajarê “Kirmaşan”ê hatiye veguhastin.

Herwisa hatiye ragihandin ku: “Heta niha pizîşkan nekariye ew gulleya ku bûye sedema birîndarbûna demarên wî derbixin û egera vê yekê heye ku, rastî qutbûna demaran bê. “Îdrîs Nûrî” niha di bin çavedêriya hûr a pizîşkî û kontrola wezîfedarên hêza Întizamî de ye.”

Heta dema belavbûna vê nûçeyê ew wezîfedarê ku teqe ji wî welatiyê Kurd kiriye nehatiye binçavkirin.