Binçavkirin û lêpirsîn ji malbata “Subhetullah Umîdî” ji şahidên dadgeha navnetewî

Di heyama çend rojên derbasbûyî de hêzên ewlehî li bajarê Kirmaşanê êrîşkiribûne ser malbata yek ji şahidên dadgeha navnetewiya xelkî ya meha “Xezelwerê”, “Subhetullah Umîdî” û dest bi vekolîna mala wan û lêpirsîn digel endamên wê malbatê kiribûn.

 “Suhbetullah Umîdî” di hevpeyvînekê digel ajansa “Kurdpa” yê ragihand: “Hêzên ewlehî êrîş kirine ser mala birayên min û dest bi vekolîna mala wan kiribûn û herwisa lêpirsîn li wan kiribûn.

Navbirî got: “Çend kes ji endamên malbata min bo heyama çend rojan hatibûne binçavkirin û lêpirsîn li wan hatibû kirin.

Herwisa “Suhbetullah” da zanîn: “Piştî revîn ji Îranê û şahidîdan li dadgeha navnetewiya xelkî ya meha Xezelwerê, givaş bo ser endamên malbata min zêde bûne.

“Suhbetullah Umîdî” welatiyê Kurd yê xelkê bajarê Kirmaşanê wekî 175`emîn şahid li dadgeha navnetewiya xelkî di peywendî digel binçavkirina xwe û kombûna nerizayetî yên meha Xezelwera sala 1398`an de li bajarê Kirmaşanê, di wê dadgehê de şahidî dabû.

Ew welatiye rêkevta 28`ê Xezelwera sala 1398`an, li meşa kombûna nerizayetiyên meha Xezelwer di demekê de ku birîndar bibû, li mala yek ji welatiyan li bajarê Kirmaşanê  ji aliyê hêzên ewlehî ve hatibû binçavkirin.

Navbirî rêkevta 6`ê Befranbara sala 1398`an, piştî bi dawîhatina heyama lêpirsîna xwe bo girtîgeha Dîzilava ya bajarê Kirmaşanê hatibû veguhastin û rêkevta 9`ê Befranbara heman salê, bi danîna barimteya 200 milyon Tumenî heta dema dadgehîkirinê hatibû azadkirin.

Kombûna dadgehîkirina wî welatiyê Kurd rêkevta 24`ê Rêbendana sala 1398`an, li taya 3`ê ya dadgeha Şoreşî ya bajarê Kirmaşanê bi serokayetiya dadwer “Esedî” hatibû li darxistin û navbirî bi tohmeta “endambûn digel yek ji Partiyên Kurdî” bi 5 sal girtîgeha te`izîrî û bi tohmeta “kombûn û tenahî li dijî ewlehiya welat” bi 5 sal girtîgeha te`izîrî hatibû cezadan.

Cezayê dadgehê dijî “Suhbetullah Umîdî” di meha Xermanana îsal de, li dadgeha pêdaçûn a parêzgeha Kirmaşanê bi awayê fermî hatibû piştrastkirin.

“Suhbetullah Umîdî” zivistana sala 1398`an, li jêr givaşa navendên ewlehî û Îtila`atî warê xwe bi cî hişt û niha rûniştiyê yek ji welatên cîranên Îranê ye.