ڕۆژی یەکشەممە ٢٨ی سەرماوەز، دوو هاووڵاتیی کورد بە ناوەکانی "سەرهەنگ عەلیزادە" کوڕی "ڕەزا" و "فەرزین عەبدوڵڵازادە" کوڕی "خالید" خەڵکی گوندی " کۆیکانـ"ـی سەر بە شاری نەغەدە، لەلایەن هێزە ئەمنییەتییەکانەوە دەسبەسەر کران.
ڕۆژی پێنجشەممە ٢ی بەفرانبار، مامۆستا "محەممەد میرزا ڕەحمانی" کوڕی دەروێش "ئەمین" خەڵکی گوندی "لۆن" سەر بە شاری کامێران، لەلایەن هێزە ئەمنییەتییەکانەوە دەسبەسەر کرا.
ڕۆژی چوارشەممە ١ی بەفرانبار، دوو هاووڵاتیی کورد بە ناوەکانی "ئیبراهیم حوسێنی" تەمەن ٥٦ ساڵ و "سەلاحەدین حوسێنی" تەمەن ٢٨ ساڵ، خەڵکی گوندی "ئاڵیاوێ" سەر بە شنۆ، بۆ تێپەڕاندنی ماوەی حوکمەکەیان ڕەوانەی زیندانی شنۆ کران.
لە ڕۆژی دووشەممە ٢١ی سەرماوەزەوە، ژمارەیەک لە زیندانییانی سیاسی و عەقیدەتیی زیندانی ورمێ لە ناڕەزایەتی دەربڕین لەمەڕ ڕاگواستنیان بۆ بەندی نوێی سەرووئەمنییەتی مانیان گرت و هەنووکەش هەر وا لە مانگرتندان.
شەوی سێشەممە ٣٠ی سەرماوەز، کۆڵبەرێک بە ناوی "م.ن"، لە ئەنجامی تەقەی هێزە نیزامییەکانی حکوومەتی ئێران لە سنووری سەلاسی باوەجانی بریندار کرا.
بەرەی یەکگرتووی کورد لە ڕاگەیاندراوێکدا، لەسێدارەدانی "حەیدەر قوربانی" زیندانیی سیاسیی ئێعدام کراوی خەڵکی شاری کامیاران لە زیندانی سنەی، مەحکووم کرد.
ڕۆژی یەکشەممە ٢٨ی سەرماوەز، لاوێکی کورد بە ناوی "سینا (کەریم) مینایی" کوڕی "مستەفا" تەمەن ١٨ ساڵ و خەڵکی گوندی "سەوجە"ی شنۆ، بە دانانی بارمتە لە یەکێک لە گرتنگە ئەمنییەتییەکانی ورمێ ئازاد کرا.
ڕۆژی دووشەممە ٢٩ی سەرماوەز، "ئەفشین حوسێنپەناهی" چالاکی مەدەنی، بۆ ستادی خەبەریی ئیدارەی ئیتلاعاتی سنە بانگهێشت و لێپرسینەوەی لەگەڵ کرا.
ڕۆژی یەکشەممە ۲٨ی سەرماوەز، کۆڵبەرێک بە ناوی "فایەق حەمیدی" بەهۆی بەربوونەوە لە بەرزایی لە سنووری نەوسوود بریندار بوو.
ڕێکخراوی مافی مرۆڤی ئێران لەسێدارەدانی "حەیدەر قوربانی"، زیندانیی سیاسیی کوردی خەڵکی شاری کامێرانی بە توندی مەحکووم کرد.
ئاژانسی هەواڵدەریی کوردپا
