نامەی بەهمەن قوبادی بۆ سەرۆک وەزیری توركیە

بەهمەن قوبادی سینەماكاری كورد سەبارەت بە رووداوە دڵتەزێنەكانی شاری كۆبانی، نامەیەكی پێشكەش بە \"ئەحمەد داود ئۆغڵوو\" كردووە.

ئەحمەد داود ئۆغڵوو
سەرۆک وەزیری بەڕێزی دەوڵەتی توركیە

لەچەند هەنگاو و نزیك سنوورەكانی وڵاتی ئێوەدا، یەكێك لە گرینگترین و مێژووییترین كارەساتەكانی ئەم دەیەی ڕابردوو خەریكە ڕوودەدات. ڕووداوگەلێك كە هاوكات بووە لەگەڵ دەستپێكردنی چالاكییەكانی ئێوە وەكوو سەرۆكی دەوڵەتی توركیە و هەڵە نابێت ئەگەر بڵێین كە داهاتووی سیاسی ئێوەش بێ شك بەم ڕووداوەوە گرێدراوە.

بێ گومان، گرینگی ئەم ڕووداوە لە چارەنووسی سیاسی وڵاتی توركیە و كەسایەتیی ئێوەدایە كە بەڕێزتانی هاندا چەند ڕۆژ پێش ئێستا، بە فەرمی ڕایبگەیەنن دەوڵەتی توركیە بە هیچ شێوەیەك ئیزن نادات كە شاری كۆبانی بكەوێتە دەستی داعشەوە.

بەڵێی، باس لەسەر كۆبانی و كوردە بێتاوانەكانی ئەوێیە و رێك لەم كاتەدا كە من ئەم نامەیە بۆ ئێوە دەنووسم، دەیان كەس لە پێاوان و ژنانی كورد، سەربەرزیی و گیانی خۆیان ناوەتە لەپی دەستیانەوە و خەریكی داكۆكیكردنن لە بست بە بستی خاكیی كۆبانی.

بەڕێز داوود ئۆغڵوو

لەو كاتەدا كە داعیش بە كردەوەی نامرۆڤانەوە پێی خستۆتە سەر گەرووی كۆبانییەوە و بە دڵڕەقیی تەواوەوە دەیەوێت كە ئەوێ بكاتە كۆگایەك لە خاك و خۆڵ و خەڵكەكەی كوشتوبڕ بكات و ئەم خەڵكە بۆ داكۆكیكردن لە خۆیان و شارەكەیان پێویستیان بە یارمەتیی نیزامی هەیە، هێزە نیزامییەكانی ئێوە لە چەند هەنگاوی نزیك شاری بێتاوانی كۆبانی، بە كەرەستە و پێداویستیی تەواوەوە تەنیا چاو لە رووداوەكە دەكەن. لەبیرتان نەچێت كاریگەری رووخانی كۆبانی بە دەستی داعیش، زیاتر لەو شتەیە كە بتوانرێت مەزندە بكرێت و بێگومان كاریگەری بەسەر ناوچەكە و وڵاتی توركیەش زۆر بەربڵاوتر دەبێت. كەواتە هێزەكانی ئێوە چاوەڕێی چین؟ چاوەڕێی ژینۆسایدی تەواوی پێاوانی كوردی كۆبانی و بە دیل گرتنی ژنانی ئەم شارەن، تا لە كۆتایی هاتنی ئەم شەڕە و تەقاندنیی چەند فیشەكێك بڵێین كە تەواوی هەوڵی خۆتاندا؟! داهاتووی سیاسی ئێوە لەم ساتە وەختەی ئێستادا دەخرێتە بەر باس و لێكۆڵینەوەوە. لە بیرتان نەچێت ئەگەر درەنگی ئێوە لە یارمەتیدانی كوردانی كۆبانی دەرئەنجامی تاڵ و قەرەبوونەكراوەی بە شوێنەوە بێت، نە تەنیا لە پێش چاوی خەڵكی دنیادا بەرپرس دەبن، بەڵكوو بێجگە لە كوردانی توركیە و سەرتاسەری جیهان، بە خەڵكی مرۆڤدۆستی وڵاتەكەشتان، كە لەگەڵ كوردەكاندا پەیوەندییەكی ئینسانی و برایانەیان بەدەر لە سنوورە ساختە و جوگرافییەكاندا هەیە، دەبێت وڵامدەر بن.

بێگومان ئەم روحیەیە جوامێرانە و داكۆكی لە ڕەگەزە نەتەوایەتییە هاوبەشەكان، لە ئێوەش و لە نەتەوەی توركیشدا بوونی هەیە. هەر بەم هۆیەوە، لەوباوەڕەدام كە بایەخی ئەم یەكێتیی ئەخلاقی و ئینسانییە بە باشی هەستی پێدەكەن. لەبیرتان نەچێت، كوردەكان مومكینە لەلایەنی جوگرافییەوە نیشتمانێكی یەكپارچە و هاوبەشیان نەبێت و لە یەكتری دوور كەوتبێتنەوە، بەڵام تەنیا یەك روحن كە هەر بەشێكی لە شوێنێك بەجێیماوە.

كوردەكانی كۆبانی مرۆڤن و سەد هەڵبەت دراوسێشتانن. چارەنووسی ئەوان لە ئێوە و ئەوانی دیكە و داهاتوو جیا نییە. یارمەتیدانی كۆبانی یارمەتیدانی هەموو مرۆڤایەتییە و سەد هەڵبەت یارمەتیدانی خۆشتانە. چونكە لە سبەینێیەكدا كە زۆر دوور نییە و وڵاتی سەربەخۆ و تایبەت بە نەتەوەی كورد لە ژێر ئەم زام و ئێش و ئاور و خۆڵەمێشەدا سەرهەڵدەدات، خەڵكانی زامدار و یارمەتیدەر و یارمەتینەدراو، لە بیریان دەمێنێت كە چ كەسێك زیاتر لە هەمووان ساڕێژی برینەكانیانی دەكرد و داكۆكی لێدەكردن و چ كەسێك لەجیاتی یارمەتی تەنیا ڕییای كردووە. ئێستا بۆ هەمووی ئێمە كاتی كردەوە و نیشاندانی ئەو نییەتانەیە كە سەبارەت بەوان قسەكراوە. كاتژمێرێكی دیكە مومكینە بۆ هەمووان درەنگ بێت. ئەگەر تەنانەت ڕێزەیەك خەم لە دڵتان جێی خۆی كردۆتەوە، لەم هەمووە زامەی كە بەسەر جەستەی دەردەداری خەڵكانی بێتاوانی كورددا هاتووە، لانی كەم سنوورەكانتان بكەنەوە تا كوردانی بێئوقرەی نیشتمانەكەت تەنانەت بە دەستی بەتاڵیشەوە كە بكرێت خۆیان بگەیێنە كۆبانی تا دیسانەوە بۆ چەند هەزارەمین جار بە درێژایی مێژوو، شەڕەف و سەربەرزیی كورد لە داكۆكیكردنی بست بە بستی ئەو خاكەی كە تێدا ژیانی بەسەر دەبەن، بە خەڵكانی جیهان نیشان بدەن.

بەڕێز ئەحمەد داود ئۆغڵوو

سبەی مومكینە زۆر درەنگ بێت. هەم بۆ كۆبانی و هەمیش بۆ ئێوە و بۆ جیهان.

بەهمەن قوبادی