بۆ رێبەرایەتی و ئەندامانی حیزب و رێکخراوە سیاسییەکانی رۆژهەڵاتی کوردستان

بەڕێزان!
بەبێ ئەوەی خۆمان بە جێگەی داد و قەزاوەت دابنێن و تەنیا لایەنێک لە پارچەپارچە بوونی حیزب و رێکخراوەکان لە رۆژهەڵاتی کوردستان خەتابار بزانین و بە بێ ‌‌ئەوە بچینە ناو هەڵسانگاندنی سیاسی باروودۆخی ئەو ناوچەیە کە کوردستانی خۆشەویستمانی تێدایە، تەنیا ئەوە دووپات و سەد پاتە دەکەینەوە کە رۆژهەڵاتی ناوەڕاست لە ساتە وەرچەرخانێکی بەپەلە دایە و ئەو هێز و گەلانە دەتوانن باشترین کەڵک لە دۆخەکە وەربگرن کە خاوەنی پلانی سیاسی خۆیانن و هێزەکانیان ڕێک خستبێ. بەداخەوە لە هەلومەرجێکی وەهادا هێزەکانی ئێمە بەدەست شەڕێکی بەردەوامی ناوخۆیەوە دەناڵیین و حیزبەکانمان دووچاری قەیرانێکن کە ئەگەر چارەسەری بنەڕیتی بۆ نەدۆزرێتەوە، کوردی رۆژهەڵات نەک قازانج ناکات کە رەنگە رەنج بە خەساریش بێ.

ئێمە چەند تاکی کورد بە ئەرکی سەرشانی خۆمانی دەزانین کە بەرامبەر ئەو پڕش و بڵاوییە هەڵوێستمان هەبێ و داوا بکەین کە هێزەکانمان رێز لە یەکتر بگرن و لە راستای بەرژەوەندیی گەلدا دەست لە شەڕە قسە، ناوچەگەریی و سوانی هێزەکان هەڵگرن و بە کۆبوونەوە لە دەوری چەند خاڵێکی گرینگ بەرەو هاوکاری هەنگاو بنێن.

بە دڵنیاییەوە ئەو رێکخراو و حیزبانە لای ئێمە رێزیان زیاترە کە بە قازانجی گەل هەنگاو هەڵێنن.
ئێمە پێمان وایە کە ئەو هێز و رێبەرییەی کە بەرژەوەندیی گەڵ و نیشتمان دەخاتە پێش بەرژەوەندیی خۆی، ئەوە لە دڵی خەڵکدا زیاتر جێگای خۆی دەکاتەوە. بە واتایەک، داری پڕ بار زیاتر دەچەمێتەوە تا دوای تۆفان قەد بکێشێتەوە.

بەڕێزان!
پەرەپێدانی دێمۆکراسیی ناوخۆیی و دیالۆگ لەگەڵ هەموو لایەنەکان و دۆستان، پێداچوونەوەیەکی سادقانە بە رابردوومان و هاوکاری هێزەکانمان، رێگا خۆش‌ دەکەن بۆ داهاتوویەکی باشتر و قازانجی خەڵکی کورد تەنیا بەم جۆرە دەستەبەر دەبێ. هەر بۆیە لێرە و لە ئەمڕۆوە داوا دەکەین کە هەموو هێز و توانای خۆتان، وەگەڕ بخەن بۆ هاوکاری. دیارە مەرج نییە ئەو هێزانە هەموو یەکبگرنەوە، بەڵکوو زۆریشمان پێ ‌باشە کە هێز و گرووپی جیاواز و هەمەڕەنگ هەبێ و پلۆرالیزم بتوانێ پەرە بە گەشەکردنی دێمۆکراسی لەناو کۆمەڵگادا بدا. بەڵام ئەو هەمە ڕەنگییە تەنیا لە سایەی دیالۆگ و رێزدا دەتوانێ بەروبۆ بدا.

ئێمە وەک بەشێک لە ژنانی کورد داوا دەکەین کە رێکخراو و حیزبەکانی سیاسیی ئێمە، بە هەر بیروبۆچوونێک کە هەیانە بە هەستی بەرپرسایەتیی زیاترەوە بەرەو دیالۆگ و هاوکاری بڕۆن. دیارە ئێمەش لە دەرەوەی حیزبەکان، ئەوەندەی لە دەستمان بێت، هێز و توانای خۆمان بۆ دروست کردنی کەش و هەوای دۆستانە لە هەر شوێنێک کە بین، بەکار دێنین و هەوڵ دەدەین بۆ نزیک کردنەوەی لایەنەکان. کارێک کە بە شانازییەوە لە ماوەی ساڵانی رابردوودا کردوومانە.
ئاسودەیی گەل و نیشتمان ئاواتمانە و بە هیوای ئەوەین کە مێتۆدی\" رێز و دیالۆگ\" تەنیا رێگای چارەسەری کێشەکان بێ.

فەریبا محەمەدی
شکۆفە قوبادی
مینا لبادی
مەهین شوکرووڵاپور
سەبری بەهمەنی
ئارێز محەمەدی
مەنیژە میرمکری
پەری کەریم‌نیا
توبا ئەلیاسی
کوێستان عومەرزادە
نەدا شەهبازی
سوسەن محەمەدخانی غیاسوه‌ند
نەهیە خۆشکەلام
سەمیرا پوراندۆخت
مەرزە جەوانمەرد
شەهلا دەبباغی