شیروان؛ ٤٢ ڕۆژ دەسبەسەرکران و ناڕوونیی چارەنووسی ئەحمەد خاکسار
۲٩ی ڕێبەندانی ۱۴۰۴؛ سەرەڕای تێپەڕبوونی ٤٢ ڕۆژ لە دەسبەسەرکرانی سەرەڕۆیانەی "ئەحمەد خاکسار" هاووڵاتیی کوردی خەڵکی شیروان سەر بە پارێزگای خوراسان، سەبارەت بە چارەنووس و شوێنی ڕاگیرانی زانیارییەک لەبەر دەستدا نییە و ئەمە نیگەرانیی بنەماڵەکەی لەمەڕ دۆخی ناوبراو زۆر کردووە.
سەرچاوەیەکی ئاگاداری کوردپا وێڕای پشتڕاستکردنەوەی ئەم هەواڵە بە کوردپای وت؛ "ئەحمەد خاکسار" ڕۆژی ١٨ی بەفرانباری ١٤٠٤ بە بێ بەڵگەی یاسایی لەلایەن هێزە ئەمنییەتییەکانەوە دەسبەسەر کرا و بۆ شوینێکی نادیار ڕاگوێزرا و لەو کاتەوە سەرەڕای بەدواداچوونی بنەماڵەکەی، هیچ زانیارییەک لە چارەنووس و شوێنی ڕاگیرانی لەبەر دەستدا نییە.
هەتا کاتی بڵاوبوونەوەی ئەم هەواڵە، ناوبراو لە مافی دەستڕاگەیشتن بە پارێزەر، چاوپێکەوتن لەگەڵ بنەماڵەکەی بێبەری کراوە.
"ئەحمەد خاکسار" باوکی کچێکە. ناوبراو لە کوردە کرمانجەکانی شیروانە.
ڤیدیۆیەک لە دانپێدانانی زۆرەملێی ناوبراو لەژێر ئەشکەنجەی تونددا لە دەنگوڕەنگی خوراسان بڵاو کراوەتەوە و ناوبراو وەک "سەرکردەی ناڕەزایەتییەکانی شیروان" ناوی هێنراوە و ئەمەش نیگەرانییەکان سەبارەت بە چارەنووس و دەرچوونی حوکمی قورس بۆ ناوبراوی زۆر کردووە..
