بۆ کۆڵبەرەکان؛ ئیبراهیم عەلیپوور وێنەگری کوردی خەڵکی بانە بە پرۆژەی "فیشەکەکان سنووریان نییە" خەڵاتی وۆرڵدپرێسی بردەوە
لە ماوەی ڕۆژانی ڕابردوودا، ئیبراهیم عەلیپوور وێنەگری کوردی خەڵکی بانە بە پرۆژەی "فیشەکەکان سنووریان نییە" کە دێکۆمێنتارێکی بەهێز و قووڵ لە ژیانی کۆڵبەران لە ناوچە سنوورییەکان نیشانی دەدا؛ بوو بە براوەی خەڵاتی وۆرڵدپرێسی ٢٠٢٥ کە یەکێک لە جێی باوەڕترین خەڵاتەکانی وێنەگری هەواڵ و دێکۆمێنتە لە جیهاندا.
ئیبراهیم عەلیپوور لەمبارەوە لە ئینستاگرامەکەی خۆیدا لەگەڵ بڵاوکردنەوەی چەند وێنە نووسیویەتی؛ "من زۆر شانازی ئەکەم بەوەی کە پرۆژەکەم لەژێر ناوی "فیشەکەکان سنووریان نییە" خەڵاتی وۆرڵدپرێس فۆتۆی بردووەتەوە. ئەم پرۆژەیە شتێک زیاتر لە کۆمەڵە وێنەیەکە، بەڵکوو بەشێک لە ئەزموونی ژیانی من وەکوو کوردێک لە ناوچە سنوورییەکانی ئێران و عێراقە.
لەم کۆمەڵە وێنەیەدا هەوڵم داوە چیرۆکی کۆڵبەران، ئەو کەسانەی کە بار دەگوازنەوە بە ڕاستی و دروستی بگێڕمەوە، چونکە ژیانی ئەوان لەگەڵ ژیانی من تێکهاڵاوە. زۆر سپاسی خەڵکی کوردستان دەکەم؛ بە بێ متمانە و بوونی ئەوان ئەم بەرهەمە دروست نەدەبوو. من بەردەوام هەوڵم داوە کە چیرۆکەکانیان بە ڕێز و ڕاستییەوە بڵێمەوە."
خەڵاتی وۆرڵدپرێس فۆتۆ یەکێک لە جێ باوەڕترین خەڵاتەکانی وێنەگریی هەواڵ و دێکۆمێنت لە جیهانە. ئەم خەڵاتە هەموو ساڵێک لەلایەن ناوەندی (World Press Photo Award) کە لە ساڵی ١٥٥ دا لە ئامستردامی هۆلەند دامەزراوە بەڕێوە دەچێ. ئامانجی سەرەکیی ئەم کێبڕکییە ڕێزگرتن لەو وێنەگرانەی هەواڵ و دێکۆمێنتە کە ڕووداوەکان، پرسە کۆمەڵایەتییەکان، پرسە مرۆیی و ژینگەییەکان بە ڕوانینێنی نوێ و لەسەر بنەمای ڕاستییەکان دەخەنە چوارچێوەی وێنەوە.
خەڵاتی وۆرڵدپرێس فۆتۆ نەتەنیا یارمەتیی وێنەگران دەدات کە دەنگی خۆیان لە ئاستی جیهانیدا بە گوێی خەڵک بگەیێنن، بەڵکوو دەبێتە هۆی ئاگایی بەخشین سەبارەت بە پرسە کۆمەڵایەتی، مرۆیی و ژینگەییەکان. زۆربەی وێنەکانی براوەی ئەم کێبڕکێیە لە مێژوودا تۆمار کراون و گۆڕانکارییە گرینگەکانی جیهانیان بە دێکۆمێنت کردووە.
لە ڕوونکردنەوەی فەرمیی World Press Photo Award دا سەبارەت بە ڕای لێژنەی هەڵسەنگاندن هاتووە؛ "هەر وێنەیەک بە تەنیایی بەهێزە، بەڵام هاوکات یارمەتیی گێڕانەوەیەکی بەربڵاو و کاریگەر دەدات. ئەم کۆمەڵەیە بینەران بانگهێشت دەکات تاکوو ڕامێنن، بە سەرنجەوە گوێ لە گێڕانەوەکان بگرن و لە ڕاستییەکانی ژیانی گەمارۆدراو تێبگەن. وێنەکان جگە لە نمایشکردنی دژوارییەکانی ژیانی کۆڵبەران، لایەنی سۆزداری و مرۆییان هەیە کە بایەخێکی زیاتر لە ڕاپۆرتە هەواڵێکیان پێ دەبەخشێ و دەبنە ئاسەوارێکی هونەریی دێکۆمێنتکراوی کۆمەڵایەتی.
ئەم کۆمەڵە وێنەیە نەتەنیا سنوورە جۆغرافیایی و سیاسییەکان بەرەوڕووی ئاستەنگ دەکاتەوە بەڵکوو نیشانی دەدات کە چۆن وێنەگری دەتوانێ سنوورەکان تێک بشکێنێ و ڕاستییە شاراوەکان ئاشکرا بکات".
