دیواندەره؛ ڕێژەی دەسبەسەرکراوانی ڕۆژی یەکشەممە گەیشتە ٥ کەس
ڕۆژی یەکشەممە ١٨ی خەرمانانی ١٤٠٣، هاووڵاتییەکی کورد بە ناوی "موزەفەر دارایی" خەڵکی دیواندەرە، لەلایەن هێزە ئەمنییەتییەکانەوە دەسبەسەر کرا و بۆ شوێنێکی نادیار ڕاگوێزرا.
بە هەژمارکردنی ئەم هاووڵاتییە، ڕێژەی دەسبەسەرکراوانی ئەم ڕۆژە لە دیواندەرە گەیشتە ٥ کەس.
بە وتەی سەرچاوەیەکی ئاگادار، هێزە ئەمنییەتییەکان بە بێ بەڵگەی یاسایی هێرشیان کردووەتە سەر ماڵی ئەم هاووڵاتییە و دەسبەسەریان کردووە.
ئەم سەرچاوە ئاگادارە وتی: هێزە ئەمنییەتییەکان ماڵی ئەم هاووڵاتییەیان پشکنیوە.
تاکوو ئێستا سەبارەت بە هۆکاری دەسبەسەرکران و تۆمەتە وەپاڵدراوەکان دژی ئەم هاووڵاتییە کوردە زانیارییەک لەبەر دەستدا نییە.
هەر لەم پێوەندییەدا، سەرلەبەیانیی ڕۆژی یەکشەممە ١٨ی خەرمانانی ١٤٠٣، محەممەد ئەمینی، نەوید شەریفی، فواد مورادی و فەرهاد قەمەری، چوار هاووڵاتیی کوردی خەڵكی دیواندەرە لەلایەن هێزە ئەمنییەتییەکانەوە دەسبەسەرکران و بۆ شوێنێکی نادیار ڕاگوێزران.
