لە ساڵڕۆژی لەدایکبوونی محەممەد حەسەنزادە؛ دەسبەسەرکرانی توندوتیژانەی باوک و خوشکی ئەم گیانلەدەستداوە لەلایەن ناوەندە ئەمنییەتییەکانەوە
ئەمڕۆ ٩ی گەلاوێژی ١٤٠٣، هاوکات لەگەڵ ساڵڕۆژی لەدایکبوونی محەممەد حەسەنزادە لە گیانلەدەستداوانی بزووتنەوەی ژن، ژیان، ئازادی لە بۆکان، هێزە ئەمنییەتییەکان هێرشیان کردووەتە سەر ماڵی باوکی ناوبراو و باوک و خوشکی ناوبراویان بە توندوتیژییەوە دەسبەسەر کردوون.
بە وتەی سەرچاوەیەکی ئاگاداری کوردپا؛ هێزە ئەمنییەتییەکان جیا لە بیڕێزیی زۆر بە ئەندامانی بنەماڵەی حەسەنزادە، ئەحمەد حەسەنزادە باوکی محەممەد حەسەنزادە و سۆلماز حەسەنزادە، خوشکی ناوبراویان بە توندوتیژی و لێدان دەسبەسەر کردووە و بۆ شوێنێکی نادیار ڕایانگواستوون.
سەرچاوەیەکی ئاگاداری کوردپا دەڵێ؛ بەبۆنەی لەدایکبوونی محەممەد حەسەنزادە، بنەماڵەکەی لە هەوڵدا بوون، ڕێوڕەسمێکی بچووکی لەدایکبوون لە ماڵەکەی خۆیاندا بەڕێوە ببەن، بەڵام لەگەڵ ڕێگریی ناوەندە ئەمنییەتییەکان و دەسبەسەرکران بەرەوڕوو بوونەوە.
هێزە ئەمنییەتییەکان جیا لە دەستداگرتن بەسەر مۆبایلی باوک و خوشکی محەممەد حەسەنزادە، دەستیان بەسەر مۆبایلی دایکیشیدا گرتووە.
سۆلماز حەسەنزادە پێشتر و لە ڕێکەوتی ٥ی ڕەزبەری ١٤٠٢شدا لەگەڵ ٣ هاووڵاتیی دیکە بە ناوەکانی "شیرین خەیات"، "سیمین خەیات" و "شەیدا ڕەزایی" بانگهێشتی میوانییەک لە شاری سەقز کرابوون کە لە خاڵی پشکنینی بۆکان_سەقز لەلایەن هێزەکانی حکوومەتەوە دەسبەسەر کرا و بۆ شوێنێکی نادیار ڕاگوێزرا.
هەروەها ڕۆژی ١٤ی خەرمانانی ١٤٠٢، ئەحمەد و سۆلماز حەسەنزادە، باوک و خوشکی محەممەد حەسەنزادە بانگی ئیتلاعاتی بۆکان کران و لێپرسینەوەیان لێ کرا.
ڕۆژی ٢٥ی خەزەڵوەری ١٤٠١، محەممەد حەسەنزادە، تەمەن ٢٨ ساڵ و خەڵکی بۆکان، لە ناڕەزایەتییە خەڵکییەکانی ئەم شارە کرایە ئامانجی فیشەکی هێزە سەرکوتکەرەکانی حکوومەت و گیانی لەدەست دا.
محەممەد حەسەنزادە، مانگێک پێش لە کوژرانی، بە هۆی بەرکەوتنی سێ فیشەکی ساچمەیی، چاوی چەپی خۆی لەدەست دابوو. ناوبراو سێ جار لە تەورێز و تاران نەشتەرگەریی بۆ کرا، بەڵام بەم حاڵەشەوە بینایی چاوی لەدەست دا.
