کوژران و برینداربوونی سێ کۆڵبەر بە تەقەی هێزە نیزامییەکانی حکوومەت لە سنووری سەردەشت
05:39 - 27 پووشپەڕ 2724
![](/content/upload/1/news-kurdpa/6581.jpg)
سەرلەبەیانیی ڕۆژی سێشەممە ٢٦ی پووشپەڕی ١٤٠٣، کۆڵبەرێکی تەمەن ١٩ ساڵ بە ناوی "کیان زەینی" خەڵکی سەردەشت، بە تەقەی هێزە نیزامییەکانی حکوومەت لە سنووری "قەندیل"ی ئەم شارە گیانی لەدەست دا و دوو کۆڵبەری دیکەش بریندار بوون.
بە وتەی سەرچاوەیەکی ئاگادار، هێزە نیزامییەکانی حکوومەت بە بێ ئاگادارکردنەوەی پێشوو تەقەیان لەم گرووپە لە کۆڵبەران کردووە.
ئەم سەرچاوە ئاگادارە ڕایگەیاند: دوو برای کۆڵبەر بە ناوەکانی "پەیمان قادری" و "کەیوان قادری" کە لەم ڕووداوەدا بریندار ببوون، بە مەبەستی وەرگرتنی چارەسەری پزیشکی ڕەوانەی نەخۆشخانەی سەردەشت کراون.
ئەم سێ کۆڵبەرە خەڵکی گوندی "ڕەشەهەرمێ" سەر بە شاری سەردەشتن.