مەریوان؛ کۆڵبەرێک بە هۆی سەرمابردووییەوە گیانی لەدەست دا
شەوی سێشەممە، ١٧ی ڕێبەندان، کۆڵبەرێک بە ناوی "فەرید ڕووبینا"، لە سنووری "هەنجیران"ی مەریوان بە هۆی سەرمابردووییەوە گیانی لەدەست دا.
بە وتەی سەرچاوەیەکی ئاگادار، تەرمی ئەم کۆڵبەرە پاش ٧ کاتژمێر گەڕان، لە بەرزاییەکانی سنووری "هەنجیران"ی مەریوان دۆزرایەوە.
ئەم کۆڵبەرە ٢٠ ڕۆژ پێش، ژیانی هاوبەشی دەست پێ کردبوو.
فەرید ڕووبینا، خەڵکی گوندی "چاڵی سوور" و دانیشتووی مەریوان بوو.
بە پشتبەستن بە ئاماری تۆمارکراو لە ناوەندی ئاماری ڕێکخراوی مافی مرۆیی کوردپا، لە ساڵی ٢٠١٢ تا ٢٠٢٣، کۆی ٢٢٠٦ کۆڵبەر کوژراون و بریندار کراون. (٥٨٩ کوژراو و ١٦١٧ بریندار)
٤٠ کەس لەو کۆڵبەرانەی کە کوژراون و بریندار کراون تەمەنیان کەمتر لە ١٨ ساڵ بووە.
زیاتر لە ٧٣٪ی ئەم کۆڵبەرانە بە تەقەی ڕاستەوخۆی هێزە نیزامییەکانی کۆماری ئیسلامی کوژراون و بریندار کراون.
کوژران و برینداربوون بە هۆی بەربوونەوە لە بەرزایی بە زیاتر لە ٦٪، بە هۆی سەرمابردوویی و هاتنی ڕنوو بە ٤٪ و بە هۆی تەقینەوەی مینیش بە نزیک ٤٪ لە گرینگترین هۆکارەکانی کوژران و برینداربوونی کۆڵبەرانن.
