بەردەوامیی دەسبەسەرکران و ناڕوونیی چارەنووسی تەیفوور سەلیمی بابامیری لە زیندانی ورمێ
تەیفوور سەلیمی بابامیری، تەمەن ٤٧ ساڵ و دانیشتووی بۆکان، پاش تێپەڕبوونی ٧ مانگ، هێشتا لە دەسبەسەریدایە و لە زیندانی ناوەندیی ورمێدا چارەنووسی ناڕوونە.
بە وتەی سەرچاوەیەکی ئاگادار، ئەم هاووڵاتییە کوردە تاکوو ئێستا لە دەسپێڕاگەیشتن بە پارێزەر بێبەری بووە و تەنیا یەک جار لەگەڵ بنەماڵەکەی چاوپێکەوتنی هەبووە.
ئەم سەرچاوە ئاگادارە ڕایگەیاند: تەیفوور سەلیمی بابامیری لە گرتنگەیدا بە مەبەستی دانپێدانانی زۆرەملێ لەژێر گوشاردا بووە.
ئەم سەرچاوە ئاگادارە وتی: چاو، دەست، شان و پەردەی گوێی تەیفوور سەلیمی بابامیری بە هۆی ئەشکەنجەی هێزە ئەمنییەتییەکانەوە تووشی کێشە بووە.
ئەم هاووڵاتییە کوردە، ڕەشەمەی ساڵی ١٤٠١، بە بێ بەڵگەی یاسایی لەلایەن هێزە ئەمنییەتییەکانەوە لە بانە دەسبەسەر کرابوو و بە مەبەستی لێپرسینەوە بۆ یەکێک لە گرتنگە ئەمنییەتییەکانی ورمێ ڕاگوێزرابوو.
ئەم هاووڵاتییە خێزاندارە و دوو منداڵی هەیە.
تاکوو ئێستا لە هۆکاری دەسبەسەرکران و تۆمەتە وەپاڵدراوەکان دژی تەیفوور سەلیمی بابامیری، زانیارییەکی ورد دەست نەکەوتووە.
