گوللەیەك بە سینگی ڕۆژهەڵاتەوە

دیاكۆ ڕۆژهەڵاتی

شەڕ، وشەیەكی زبر و دڕو لیچقن و قێزەونە، ئەو وشەیە كاتێك گیانی وەبەر دێ و وە جووڵە دەكەوێ، لەگەڵ خۆی وێرانی و سووتماك و خوێن ڕشتن و ئاوارەیی و كەم ئەندامی دێنێ و دەبێتە مۆتە و دەست دەنێتە بێنی ‌‌ژیان و گیانی لێ دەستێنێ. هەر كاتێك لاپەڕەكانی مێژوو هەڵدەدرێتەوە و لێی دەڕوانی و دەبینی كە لە شەڕ دەدوێن، بۆنی مردن و وێرانیانەی لێ دێ و هەر كەڕەتێك، ژیانێك و جوانییەكیان سەرو بن كردووە و ئاوریان بە جەرگی گەلێكەوە داوە و كسپەیان لە هەناوان هەستاندووە. ئەگەر ئەم وشەیە لە نێو قامووسەكاندا بوونی نەبوایە و هەرگێز لە مێژووی مرۆڤایەتی دا بیچمی نەگرتایە و نەكەوتایەتە كردارەوە، ئەوە مرۆڤ لە زۆر نەهامەتی و سەغڵەتی قوتاویان دەبوو.

بەڵام بە داخەوە، ئەم وشە قێزەون و زبرە لە نێو مرۆڤەكاندا بە ئەندازەی وشەی ئەوین، ئازادی و شادی و بگرە زیاتریش لایەنگری هەیە و بۆ كەسگەلێك و كۆمەڵ گەلێك، بۆتە بژیوو هۆی شانازی و دایمە تاقرانییەكیان لە سەر دەستە بۆشەڕ و پەلاماردان و سووتان و جەرگ بەتەندوورەوە نان و لە پەنای ئەو سووتماك و وێرانییەدا، خوانی خویانی بۆ دەڕازێنێتەوە وبۆ شادیانە پەیكی شەڕابی بۆ هەڵدەدەن و قاقای شادی بۆ هەڵدەفڕێنن. زور جارلە مێژوودا شەرگەلێك هەبوونە.

هەڵاسیاون و بە ئاوردووی گیانی مرۆڤەكان، ماوەیەكی زۆر ناسیاون و گەشاونەتەوەو چرای زۆر ژیانیان كوژاندۆتەوە و ‌سەری زۆر حەز و ئاواتیان پەڕاندووە و تێدا بردووە و ئاكامیش بۆتەوە هیچ. كەسانێك بە بزە و پێكەنینەوە چوونەتە سەر مێزی وتوێژو دەستیان ناوەتە نێو دەستی یەكتر و باسی برایەتی و دراوسیەتی و ئاشتیان كردووە و بێ دەسكەوت و بەهرە هەر كەس چۆتەوە ماڵی خۆی. بەڵام بە داخەوە مرۆڤەكان كەمتر ئەزموونیان لەو ڕووداوانە وەرگرتووە وئێستاش بەردەوام ئەو كارانە دووبارە دەبنەوە و ماڵ وێران دەكەون و شار دەسووتێنن و جەرگ بە تەندوورەوە دەدەن.

لە نێوان ئەم شەڕ و كوشتار و خوێن ڕشتنانەدا، قێزەون ترین شەڕ، شەڕی براكوژییە و لەم چەشنە شەڕانەدا فیشەكەكان بەردەوام بە سنگی خۆییەوە دەنرێن و هەر سنگێك لە هەر لایەك بكرێت، دڵی دایكی نیشتمان بە تەندوورەوە دەدرێ و خوێناناو لە جەرگی دەكرێت وئەوە بەردەوام لە دڵی ئەو دایكەوە خوێن دەچۆڕێ و لە هەناویەوە هەناسەی ئاگرین دێتە دەرێ. بە داخەوە مێژووی ئێمەی كوردیش، پڕە لەو چەشنە شەڕانە و ئەوەندەمان جەستەی یەكتر زامار كردووە كە ساڕێژ كردنەوەی زۆر سەختە و هەتا دێین تۆزی فەرامۆشی بە سەر یەكێكیان دا بكەین، زامێكی دیكەمان لە جەستە دەدرێ و ئەم كارە دزێوە لە لایەكی دیكەوە سەر هەڵداتەوە و گورچكمان دەبڕێ و ئاگر لە هەناومان بەردەدا.

ڕووداوە تاڵەكەی ئەم جارە و هێرشەكەی پەكەكە بۆ سەر پێشمەرگەكانی حیزبی دیموكڕاتی ئێران و شەهید كردنی كاك قادر كەریمی و بریندار كردنی سێ كەسی دیكە، دیسان برینە كۆنەكەی لێ تازە كردینەوە و ژانی نوێی بە جەستەماندا هێنا.

بە دڵنیاییەوە ئەو فیشەكەی پەكەكە نای بە سنگی قادر كەریمییەوە، گوللەیەك بوو نرا بە سنگی تاك تاكی خەڵكی ڕۆژهەڵاتی كوردستانەوە وقەڵەشتێكی گەورەی خستە نێوان ئەو برایەتییەی شەز لە گەڵ داعش لە نێو كوردان‌دا پێكی هێنابو جەرگی هەموولایەكی وەژان خست و ئەم كارە نا بەرپرسانەی بە نێوی قۆرغكردنی خاكی كوردستان لە خەڵكی ئەو وڵاتە جێی داغ و ژانێكی زۆرەو دەكرێ بە وردی لێی بكۆڵدرێتەوە و بزانرێ ئەوانەی هەموو كوردستان بە وڵاتێك و خاكێك بۆ خۆیان دەزانن، چۆنە ئەو مافە بۆ خەڵكی تر ڕەوا نازانن .

ئەو گوللەی دەبێ بنرێت بە سینگی دوژمنانی كوردەوە، چۆنە ئێستا لە لایەن لایەنێكەوەپارێزگاری نەیارانی گەلێ پێدەكرێ و بە سنگی باشترین ڕۆڵەكانی ئەو گەلەوە دەنرێ؟ هەموو بە باشی ئەوە دەزانین كە دێموكڕات لە ماوەی ئەو دوودەیەدا بۆ بەرژەوەندی باشووری كوردستان، بێدەنگی ڕەچاو كردووە و چەكەكانی هەڵواسیوە نەلە بێ دەسەڵاتی دابوە و نە لە تەریك كەوتنەوە لە نێو خەڵك دا. ئەم حیزبە بەو لایەنگرە زۆر و زەوەندەی لە ڕۆژهەڵات دا هەیەتی.

هەر كات ئیرادە بكات دەتوانێ كوانووی خەبات گرداتەوە و ئامێزی خاكی كوردستان و خەڵكی ڕۆژهەڵاتیش هەر دەم ئاواڵەیە بۆی و هەر كەسێكیش دەست بە سینگی ئەوانەوە بنێ لەگەڵ هەڵواسینی توندی خەڵكی ڕۆژهەڵاتی بەڕوودا دەدرێتەوە. لە ماوەی ئەم چەند ساڵەی ڕابردوودا ئەگەر كەسانێكیش بە هەزار و فێڵ و خۆ رەنكردن توانیبیتیان خەڵك چەواشە بكەن و خۆیان بكەنە دەمڕاستی وڵات، بەو كارەیان ڕووی ڕاستیان دەركەوت و پەردەكان لادران. هیواردام لەمەبەولاوە پاوان خوازی و من منێتی نەمێنێ و هەر كەسەوكاری خۆی بكات و ماڵ لە خێوی حەرام نەكرێ و كەسانێك نەبنە كەوا سووری بەر لەشكری دوژمن و لەمە بەولاوە خوێنی كورد بۆ بەرژەوەندی دوژمنانی كوردڕ بە دەستی كورد نەڕژێ.

ئەم بابەتە روانگەی نووسەرەکەیەتی و ئاژانسی کوردپا لە ناوەڕۆکی بەرپرسیار نییە