چه‌وه‌ڕی ڕاده‌داڵاهوو - سەعید عیبادەتیان

سەعید عیبادەتیان - گیلانغرب

دڵم بێاوانێگ ته‌نیاس
پڕ له‌وێرانیه‌یل واس
ئه‌تر شه‌وه‌اره‌گان یاس
چه‌وه‌ڕێ ڕاده‌داڵاهوو  

ت ده‌رد بێ ده‌رمانمی
هه‌م مه‌ڵهه‌می هه‌م ژانمی
سووماێ چه‌وه‌یله‌گانمی
چه‌وه‌ڕی ڕاده‌داڵاهوو

ساز ده‌سم حه‌ێرانده‌
جه‌سه‌م به‌ن به‌ن وێرانده
دیده‌م، واده‌ێ سێرانده
چه‌وه‌ڕی راده‌داڵاهوو

له‌هجراند به‌نه‌یل بان
له‌لیم سووز سه‌رته‌ز توان
ڕێوار ڕییه‌گه‌ێ که‌شکه‌شان
چه‌وه‌ڕی ڕاده‌داڵاهوو

په‌پوو خوه‌ش جه‌مال هاته‌وه‌
شه‌یدا و سووک باڵ هاته‌وه‌
ڕه‌نگین و پڕ خاڵ هاته‌وه‌
چه‌وه‌ڕی ڕاده‌داڵاهوو

کۊه‌یل کیشانه تووڕ که‌و
چه‌قی چه‌قاڵه‌ێ چه‌و له‌خه‌و
نه‌رگس سۊه‌رمێ دایه‌له‌چه‌و
چه‌وه‌ڕی ڕاده‌داڵاهوو

که‌ێکوو چه‌نی نه‌خش ها چووێ!
شه‌وبوو چه‌نێ خوه‌شه بووێ!
له‌ولاو چه‌نێ ته‌رکه‌لووێ!
چه‌وه‌ڕێ ڕاده‌داڵاهوو

شنه‌ێ واێ شه‌مال هاته‌وه‌
شوان وه‌شمشاڵ هاته‌وه‌
کووچ کورده مال هاته‌وه‌
چه‌وه‌ڕێ ڕاده داڵاهوو