لە چارەنووسی سێ چالاکی سوننی مەزهەب هیچ زانیارییەک لەبەردەستدا نییە

چارەنووسی سێ چالاکی سوننی مەزهەب بە ناوەکانی "ئەمیر زکالاب، پێشنوێژی هەینی گوندی ئەرمەنی بڵاغی بۆکان، عەبدولعەزیز حەیدەرپوور خەڵکی گوندی کەرێزەی ناوچەی ئەنزەلی ورمێ و حامید عەلی مشکوێ خەڵکی ورمێ"، ناڕوونە.

ئەمیر زکالاب ڕێکەوتی ٢٠ی گەلاوێژی ئەمساڵ، لەلایەن ‌‌هێزە ئەمنییەتییەکانەوە دەسبەسەر کرا و لە ماوەی دەسبەسەرکرانیدا لە "دەسپێڕاگەیشتن بە پارێزەر و چاوپێکەوتن لەگەڵ بنەماڵەکەی" بێبەری کراوە.

هەتا ئێستا بەدواچوونی بنەماڵەی مامۆستا ئەمیر بۆ ئاگاداربوون لە چارەنووسی ناوبراو بێ ئاکام بووە.

هەروەها حامید عەلی مشکوێ و عەبدولعەزیز حەیدەرپوور لە ماوەی دەسبەسەرکرانیدا، لە "دەسپێڕاگەیشتن بە پارێزەر و چاوپێکەوتن لەگەڵ بنەماڵەکەیان" بێبەری و هێزە ئەمنییەتییەکان لە دانی هەر جۆرە وڵامێکی ڕوون بە بنەماڵەی ئەو دوو چالاکە سوننی مەزهەبە، لەو پەیوەندییەدا، خۆیان دەبوێرن.

حامید عەلی مشکوێ ڕۆژی چوارشەممە ١ی گەلاوێژ و عەبدولعەزیز حەیدەرپوور، ڕۆژی یەکشەممە ٢٣ی خەرمانان، بەبێ بەڵگەی یاسایی لەلایەن هێزە ئەمنییەتییەکانەوە دەسبەسەر کرابوون.