خوێنی كاسبكارانی كورد و چاوی گەشی منداڵەكانیان

خوێنی كاسبكارانی كورد و چاوی گەشی منداڵەكانیان
شێركۆ جیهانی
1)
گوێم لە دەنگی گۆرانیەكە بە ناوی \"نان\". ئەمە گۆرانیەكە كە یەكەم جار مامۆستا نەجمەدین غوڵامی خوێندبوو، بەڵام ئێستا بە دەنگی \"سەراپ سۆنمەز\" گوێم لێگرتووە. گۆرانیەك كە بەم رستانە دەست پێدەكات:
\" من ئەو كەسەم، هەموو رۆژێ
ژیانی ئەمڕۆم دەفرۆشم
بۆ كڕینی نانی سبەی.
ئەمڕۆش دیسان، هاتوومە دەر
هەی ژین، هەی ژین
ژیانی ئەمڕۆم بفرۆشم
لێم ناكڕێ خاوەنی نان، لێم ناكڕێ\"...
ئەمڕۆش سەرێك لە ماڵپەرەكان دەدەم. جارێكی تر دەنگوباسی كوشتاری كاسبكارانی كورد. رژانی خوێنی كاسبكاران و كۆڵبەرانی كورد بە دەستی سەربازانی داگیركەر، بۆتە شتێكی ئاسایی و رۆژانە. لەناو ئەم كاسبكارانەدا، تەنانەت خوێندكاری زانكۆ و منداڵی تەمەن ژێر پازدە و شازدە ساڵیش دەبینرێن. بۆمباران و تۆپباران و گرتن و ئەشكەنجە و لەسێدارە دان لەلایەك و لەو بەریشەوە كوشتاری كاسبكاران! لەبیرمە چەندین ساڵ لەمەوپێش كەلە مەهاباد بووم و هێشتا ئاوارەی هەندەران نەببووم، لە ماڵی دۆستێكی شۆڕشگێڕم میوان بووم. چاومان لە یەكێك لە كاناڵە كوردییەكان دەكرد و كاتی دەنگوباس هاتبوو. دایكی هەموو جارێ بە بیستنی خەبەرەكان، دڵی لەخۆوە دەبووە. بەردەوام تراژیدیا و خەبەری ناخۆش....
\" دا توخودا بیگۆڕن، دڵم لە خۆوە بۆوە. \" ئەمە قسەی ئەم دایكە بوو.
من لەبەر خۆمەوە بیر لەوە دەكەمەوە كە ئەوەی بێدەنگە لە ئاست ئەم كارەساتانە، تاوانبارە، بەڵام ئەوەی كە باسی دەكات چی؟ دەبێ باس بكرێ، دەبێ مرۆڤ راستیی تاڵی وڵاتەكەی نیشان بدات. هەر بۆیەش كە مەخابن لە هێندێك مێدیا و ماڵپەڕەی كوردی، دڵۆپ دڵۆپ خوێن دەتكێ...

2)
لە بیرمە نەونەمامێكی نزیك شازە حەڤدە ساڵان دەبووم. لە گەڕەكی دۆڵی كەروێشكەی شاری مەهاباد جیرانێكمان هەبوو كە وەستا مەحەمەدیان پێ دەگووت. وەستایەكی خانوبەرە بوو كە جاروبارە زستانان لە گەڵ بێكار بوونی، دەچووە پیرانشار و سیگاری دەهێنا. چەند جاران بە دایكمی گوتبوو كە ئەگەر كوڕەكەشت پێی خۆشە، با بێكار نەبێ و جاروبارە، لانیكەم رۆژانی هەینی لەگەڵم بێت و سیگار بێنێ. لەگەڵ ئەوەشدا كە قەت لە ژیانمدا تەجرووبەی بازاڕ و كاری لەم جۆرەم نەبوو، رۆژێكی قوڕ و چڵپاوی زستان، لەگەڵ كاك محەممەد ڕۆیشتم. بۆ ئەوەی پووڵێكی زۆرمان نەچێت لە جیاتی ماشێنەكانی سەواریی نێوان شارەكان، سواری مینی بووسێك بووین و دوای نزیكەی یەك كاتژمێر و نیو رێگە بڕین، گەیشتینە پیرانشار. بازاڕی سیگار و مەعامەلە و كڕینی سیگارەكان و دواتریش قۆناغی مەترسیداری گەڕانەوە بۆ مەهاباد...
ئەوانەی سیگاریان دەهێنا، دوو دەستە بوون. دەستەیەك كە سیگارێكی زۆریان دەكڕی و بە سواری جیپ و بەنێو شاخ و داخان، بە رێگای سەخت و دوور دا شارە و شار و گوند بە گوند سیگارەكانیان رادەگواست و ئەوانەش كە سیگاریكی كەمیان دەكڕی و لەناو جانتایەكی بچكۆڵەیان دەخست و هێندێكیشیان لە خۆیان دەبەست. واتە دەیانخستە ژێر كۆت و كاپشێنەكانیان. زۆر ژنیش، بۆكسە سیگارەكانیان دەخستە ناو دەرپێیەكانیان. فەزایەكی ناخۆش بوو لەبەرچاوم. قووڕ و چڵپاو و ترس و سەرما و ماندوویەتی رێگا و ... لە هەمووی ناخۆشتر دەرباز كردنی پاسگاكان و پایەگاكانی كۆنترۆڵ بوو. واتا ترس و لەرزەكە. منیش هێندێك سیگارم لەگەڵ خۆم هێنابوو. سیگارەكان كەم بوون. سواری مینی بووس بووینەوە و بەرەو مەهاباد وەڕێ كەوتین. لە رێگەدا، لە یەكەمین وێستگەی سەربازی لێپرسینەوە، سەربازێكی خوێڕی هاتەسەر و هاوكات لەگەڵ پرسینی ناو و ناسنامەی خەڵك و وەرگرتنی كارتەكانی پێناسەیان، ژێر سەندەڵییەكانی كۆنترۆڵ دەكرد و جانتای خەڵك و تەنانەت جلوبەرگی هێندێك كەسی دەگەڕا. لەبەر ئەوەی خەڵكانێك بەردەوام لەو هێڵەدا سیگاریان دەهێنا، لە دوورەوە سەربازەكان ئەوانیان دەناسیەوە و جار و بارە بە وەرگرتنی بەرتیل رێگەیان پێدەدان بڕۆن و جاروبارەش دەیانگرتن! بەڵام لەبەر ئەوەی كە من سیمایەكی تازە بووم، گومانی ئەوەیان لێ نەكردم كە شتێكم پێ بێت.
سەربازەكە درێژەی بە لێگەڕین و پشكنین دا و لەناكاو لە پشتەوەی مینی بووسەكە هات و هەڵلایەك ساز بوو، سەربازە ئێرانیەكە گیری بە ژنێكی هەژاری پیر دابوو كە چەند پاكەت سیگاری لەناو دەرپێیەكەی دابوو. بە زۆری دەیهەویست دایبەزێنێ و ژنەش هاواری دەكرد و دەگریا و دەیگووت: \" باشە ئەگەر ئەو سیگارانە نەبەم چ بكەم؟ خۆ هیچ كارێك نییە بیكەم. ئەو سیگارانەش خۆ تەنیا بەشی بژی و مەمرە، قازانجم بۆ دەكەن. هەموو سەرمایەكەم ئەوەندەیە، بۆ دەتانهەوێ بۆ خۆم و مندالەكانم لە برسان بمرین. باشە مەگەر ئێوە خۆتان سیگار ناكێشن؟ ئەوەیە ئیسلامەتیتان؟ ئەوەیە ئینساف و ئینسانیەتیان؟ ئاخر سیگار بۆ دەبێ قاچاغ بێ؟\" ... بەڵام سەربازەكە كە خۆی لە موعتادیش دەچوو بە زمانی فارسی بە سەریدا دەیگوڕاند و دەیگوت: \" ئەگەر دانەبەزی، بە زۆری داتدەبەزێنم. سەربازەكانی دیكەش بانگ دەكەم بێنە ئێرە ها. ناهێڵم ئەو ماشینە بڕوا تا نەیەیە خوارێ‌!\"
لەناو مووسافیرەكاندا، بەشێك لەو موسافیرانەی كە غیرەتیان كەم بوو یان خۆیان بە دزی سیگاریان پێ بوو، بێدەنگ بوون، بەلام چەند كەسێك وە جواب هاتن و لە سەربازەكە تووڕە بوون و داوایان لێكرد كە ئەو ژنە هەژارە بەر بدات. هێندێك لە موسافیرەكان لە سەربازەكە تووڕە دەبوون و هێندێكیشیان لەبەری دەپاڕانەوە و تكایان بۆ ژنە دەكرد. بەو شێوەیە دوای چەند دەقە هاتوهەڵڵا و پارانەوە، سەربازەكە بەجێی هێشتین و هاتە خوار و مینی بووسی ئێمەش درێژەی بە رێگاكەی دا. بەڵام ئەمە تاقە وێستگە و پایەگای سەربازیی سەر رێگەمان نەبوو. سێ وێستگە و پایەگای دیكە لە سەر رێ مابوون و لەو رێیەدا، چەند كەسێك بە سیگارەوە گیران !!!
من و وەستا محەممەد كە سیگارەكانمان بە ساغی گەیاندبووە مەهاباد، چووینە مەیدانی ئاردی مەهاباد و سیگارەكانمان لە بازاڕی سیگاری ئەو شارە فرۆشت. كاتێك حیسابم كرد و پارەی خۆراك و ماشێنم لێك داوە، دیتم كە قازانجێكی زۆر كەمی كردووە. بڕیاڕم دا كە ئیتر نەچمەوە، بەڵام لە ماڵێ دایكم پێی گوتم كە دەبێ فێری كاسبی بی و كاسبی گەورەش لەو هەنگاوە سەرەتاییانەوە دەست پێدەكات. بەو شێوەیە چەند جارێكی دیكەش چوومەوە و فەلاكەتی ژیانی خەڵكم بە چاوی خۆم بینی. چەند جاریش، تەنانەت دوای هێنانەوەی سیگارەكانیش بۆ مەهاباد، لە جیاتی قازانج كردن، زەرەرم كرد و ئاخرین جاریش سیگارەكانم لێگیراو و هەرچەندی ئەو ماوەیە پەیدام كردبوو، لە دەستم دا. واتە قازانج سەری مایەشی خوارد بوو. ئەوە یەكەمین تەجروبەی كاریی من نەبوو. نا، پێشتر، تەنیا بۆ ئەوەی ژیانی كرێكاری تەجرووبە بكەم، بیست و یەك رۆژان لە تەپەی قازیی مەهاباد و لە كاتی ساز كردنی بینای \"تەلەفۆنخانە\"دا كارم كردبوو، بەڵام ئەمە یەكەمین ئەزموونی كاری قاچاخم بوو، ئەزموونێكی بەڕاستی تاڵ....

3)
ئەگەر لە ئورووپا، كەسێك وەك قاچاخچی بناسرێت، خەڵك زۆر بە سووكی چاوی لێ دەكەن. قاچاخ كردن، بەتایبەت لە وڵاتانی سكاندیناویا، بە تاوانێكی گەورە دەژمێرێت. كاتێك وشەی قاچاخ دێتە گوێیان، هێندێك لەوان یان باندێكی مافیای مادە بێهۆشكەرەكان دەیهێننە بەرچاوی خۆیان، یان كەسانێك كە بۆ دەوڵەمەند بوون، بۆ وێنە لە سوییدەوە گۆشت دەبەنە نۆروێژ و دەیفرۆشن. بەڵام قاچاخچیەتی لە كوردستان، جیاوازە. بەشێكی زۆر لەو كەسانەی كە روویان لەو كارە كردووە (نەك هەموویان) لە رووی هەژاری و بەهۆی بێكاری، بە دانانی سەرمایەیەكی كەم یان تەنانەت بە سەرمایەی كەسانێك كە كاریان بۆ دەكەن، یان بە پارەی قەرز و قۆڵ، روو دەكەنە كاری قاچاخ. بە گشتی كاسبكارانی كورد، باری مەترسیداری وەك مادە هۆشبەرەكانیان پێ نییە و بارەكانیان شتی لە وێنەی سیگار، چایی، كەرەسەكانی ناو ماڵ لە وێنەی تەلەڤیزیۆن، یەخچاڵ و شتی لەم جۆرەیە. ئەم كەرەسانە ئەو شتانەن كە هەموو كەس لە سەرتاسەری ئێران و جیهان، بەكاریان دەهێنن، تەنانەت خودی ئەو سەربازانەی كە تەقە لەو كاسبكارانە دەكەن كە هەڵگری ئەو بارانەن! زۆر جار منداڵێكی كورد، تەنیا بە تاوانی ئەوەی كە كۆڵەبارێكی چایی بە كۆڵەوە بووە، لەناو شاخ و داخەكانی كوردستان و بە گوللەی سەربازانی دەوڵەتی ئێران یان توركیە كوژراون. تاقە بارێك كەلە روانگەی كۆماری ئیسلامیەوە، بە هۆی یاساكانی ئیسلامی نابێ خەڵك كەڵكی لێ وەربگرن و هێندێك قاچاخچی كورد دەیهێنن، مەشرووبە. بەڵام هیچكام لەمانە تاوانی قاچاخ كردنیان لەو ئاستەدا نیە كە هەڵگری بارەكە بدرێتە بەر گوللە و بیكوژن!
سەرنجڕاكێشە كە هێزەكانی كۆماری ئیسلامی، گەلێك جاران دوای ئەوەی كە كاسبكارێكی كورد دەگرن یان دەیكوژن، دەست بەسەر بارەكانیدا دەگرن و بەشێكی زۆر لە بارەكانی، لەلایەن خودی سەربازوكان و بەرپرسانی نیزامیی حكوومەتی ئیسلامیی ئێرانەوە بە تالان دەبرێت!
بیهێننە بەرچاوی خۆتان كە ئێوە بۆ وێنە پیاوێكی تەمەن بیست و چەند ساڵەی كوردن و بێكارن. لەبەر بێكاری روو دەكەنە سنوورەكان و گەلێك سەعات لەناو شاخ و داخەكان و بە سەرما و تاریكی رێ دەپێون و دواتریش بارێكی لە وێنە سیگار یان چایی بە كۆڵەوە دەگرن و لە رێگای گەڕانەوەدا لەگەڵ هاوڕێیانتان دەكەونە ناو كەمینی سەربازانی ئێران و تەقەتان لێ دەكەن. چەند كەس دەكوژرێن و دواتریش خۆتان دەگیرێن. رەفتاری سەربازانی دەوڵەتی چۆن دەبێ لەگەڵتان؟ ئەوەندەی كە تا ئێستا دیتراوە بەم جۆرەیە:
جاش و سەربازەكان دێنە سەرتان. دەست دەكەن بە لێدانی ئێوە و تەنانەت بریندارەكانیش كە خوێنیان لە جەستە دەچۆڕێتەوە دەدەنە بەر شەق. زۆر جار بریندارێك بەهۆی ئەوەی نەیانگەیاندۆتە دوكتور، گیانی لەدەست داوە. دواتر بارەكانتان و خۆتان و ئەسپەكانتان دەبەنە پاسگا و لەوێ دوای ئەوەی كە دەست بەسەر بارەكاندا دەگرن، دانە دانە ئەسپەكانیشتان لەلایەن هێزە ئینتزامییەكانەوە بە كوشت دچن! ئەوجار خۆتان لە ژوورێكی تاكەكەسی سارد و سڕدا رادەگرن و رۆژی دواتر رادەستی دادگاتان دەكەن و دادگاش بە تاوانگەلی وەك \" دەرباز كردنی نایاسایی سنوور، هەڵگرتنی باری قاچاخ و ...چەند تاوانی دیكە\" سزای زیندان و جەریمەتان بۆ دەنووسێ. ئەگەر پارەی جەریمەكەشتان نەبێت كە چەندین بەرابەری بارەكانتانە، ئەوا دادگا بڕیاڕ دەدات كەلە جیاتی پارەكە، لە زیندان بمێننەوە! بەو شێوەیە هاوسەر و منداڵەكانیان كە چاوەڕێی ئەوەن كە لەتە نانێكیان بۆ بەرنەوە، یان هەواڵی مەرگی ئێوەیان بۆ دەچێت یان هەواڵی گیران و زیندانی كردن و جەریمە بوونتان! مانەوە لە زیندانیش واتە دواكەوتنی كرێ خانوو، قەرز و قۆڵ و تەنانەت لێك ترازانی بنەماڵە! دوای ئازادی چی؟ چی هەیە بیكەن؟ رەنگە دیسان روو بكەنەوە هەمان كاری پێشوو... قەرز كردنەوەی هێندێك سەرمایە، كڕینی ئەسپێك یان بوون بە ئەسپ و لە كۆڵ نانی بار و سەرما و تاریكیی شەو و دەرباز كردنی پێچ و خەمە سەختەكانی شاخەكان و رووبەڕوو بوونەوە لەگەڵ كەمینی گورگی دوو پێ، واتە سەربازانی داگیركەر...
پەستی و نامەردی ئەو خۆ فرۆش و سەربازانە كاتێك ئاشكرا دەبێت كە تەنانەت رەحم بە ئەسپە بەستەزمانەكانیش ناكەن و دەیاندەنە بەر گوللە. ئەسپی بەستەزمان كە بەردەوام رەنجی دیتووە و باری پێ كێشراوە، نازانێ بە چ تاوانێك كابرای پاسدار یان سەرباز، تەقەی لێ دەكات و دەیكوژێت! ئەوەی ئەمانە دەیكەن، ناوی قەتڵ و بێ شەرەفیە. ئەوان ژمارەیەك بكوژ و قاتڵن كە یاسا دەستی ئاواڵە هێشتوون بۆ كوشتاری بێ لێپرسینەوەی خەڵك و تاڵانی بارەكانیان و ...

4)
مەخابن لە گەڵ ئەوەشدا كە بەدەیان ساڵە كاسبكارانی كورد لەلایەن داگیركەرانەوە دەكوژرێن، بەڵام بەو جۆرەی كە پێویستە فۆكوسیان لەسەر نەكرابوو. رەنگە یەكەم جار لە كەسانێك لە هێندێك چیرۆكدا یانیش \"یولماز گۆنەی\" لە چەند دیمەنێكی فیلمی \"رێگە \"دا سەرنجیان داوەتە سەر ئەم تراژیدیایە. بەڵام بە گشتی بابەتی كوشتاری كاسبكاران، یەكەم جار لەلایەن ئێمەوە لە \"ڕێكخراوی مافی مرۆڤی كوردستان\" بە شێوەیەكی بەربڵاو ورووژێنرا. بەختەوەرانە فۆكوسی هەواڵگری ڕێكخراوی مافی مرۆڤی كوردستان لە ساڵی 2005ەوە تا كاتی گیرانی بەڕێز كەبودوەند، سەرۆكی ئەم ڕێكخراوەیە، كاریگەرییەكی باشی لەسەر هێندێك ماڵپەڕ و میدیای كوردی دانا كە زۆرتر گرینگی بدەنە ژیان و مەرگی كاسبكارانی كورد، بەڵام لەگەڵ ئەوەشدا دیسان، ئەوەندەی كە پێویستە، تراژیدیای ژیانی ئەوان رەنگی نەداوەتەوە. واتە ئەگەر چاوێك لە ئاستی بەرفراوانیی ئەم كوشتار و گرتن و شكەنجانە لە كوردستان دەكەین، دەبینین كە میدیای كوردی تەنیا بەشێكی زۆر كەمی باس كردووە و دڵۆپێك لە دەریای هێناوەتە بەرچاو. بە سەدان كاسبكار دەكوژرێن و ناوی دەیان كەسیان دەگاتە دەستی میدیای كوردی. بەشیكی زۆر لە كاسبكارانی كورد، بە هۆی ئەوەی كەلە بنەماڵەی هەژارن، دوای كوژرانیان دەرفەتی راگەیاندنی خەبەری ئەم كوشتنە، ناگاتە كەس. بنەماڵەكەیان یان نازانن چی بكەن و چۆن خەبەرەكەی بڵاو بكەنەوە و بیدەن بە كێ؟ یانیش دەرفەت و ئیمكانی ئینتێرنێت و ناردنی وێنە و هەواڵەكەیان نیە. راگەیاندن نەبۆتە فەرهەنگێكی گشتی لەناو خەڵك و تەنیا هێندێك جار و هێندیك كەسی تایبەتی، رەنگە هەواڵی ژمارەیەك لەو كاسبكارانە بڵاو بكەنەوە كە بیستوویانە یان ئاگایان لێیە و ئەم كەسانەش ژمارەیان زۆر كەمە و لە وڵاتێكی گەورەی وەك كوردستاندا، ئەوان رەنگە ئاگایان لە هێندێك رووداوی هەرێمێكی سنووردار بیت و بەس. لەگەڵ ئەوەشدا دیسان، بڵاو بوونەوەی ئەم ژمارە كەمە هەواڵەش، بۆ وێنە دەبێتە هۆی لەخۆوە بوونی دڵی كەسێكی وەك دایكی ئەم دۆستە شۆڕشگێڕەی كە باسم كرد. مەخابن، ئەم دڵۆپە خوێنانە هەر دەتكێن و ئێمەش دەبێ باسیان بكەین، ئەگینا دەبینە شەریكی بێدەنگی لە ستەمێك كە جیهان چاوی لێ نووقاندووە!

5)
لەم رۆژانەدا لە ستۆكهۆڵم، لەگەڵ یەكێك لە دۆستانم، باسی رۆژهەڵاتی كوردستان و بیرەوەری رۆژانی پێشوومان دەكرد. باسەكەمان هاتە سەر رەوشی ئابووریی خەڵك و بێكاری و هەژاری و ناچار بوونی هێندێك جەوان بە روو هێنان بۆ كاری قاچاخی، ئەم دۆستە گوتی كە ئەویش سەردەمانێك جیپێكی كڕیبوو بۆ بردنی باری لە وێنەی مەشرووب لە شاری بۆكانەوە بۆ تاران. هێندێك بیرەوەیی سەرنجراكێشی بۆ باس كردم و مەترسییەكانی ئەم رێگایە و تەسادوف و گیران و زۆر شتی دیكەی كە بەسەری هاتبوو، گێڕاوە. بەڵام یەكێك لەو شتانەی كە گێڕایەوە و زۆر دڵتەزێن بوو، باسی ژنێك بوو بە ناوی \"خ\" كە بەهۆی مردنی مێردەكەی و بۆ تێر كردنی زگی خۆی و منداڵەكانی، بە ناچار هێندێك پووڵی قەرز كردبوو، دواتریش بە جیپەكەی ئەو، باری دەبردە تاران.
ئەم دۆستە گێڕایەوە كە جارێك لە رێگەدا ئەم ژنە، كە ئەوكات تەمەنی چل و پێنج ساڵ دەبوو، بۆی گێڕاوەتەوە كە كاری قاچاخی لە هێنانی سیگارەوە، لە پیرانشارەوە بۆ مەهاباد، واتە هەمان ئەو رێگایەی كە من چووبووم، بە مینی بووس دەست پێكردووە. زۆر جارانیش گیراوە و بەدەست بەتاڵی ماوەتەوە. ئەوانەی كە سیگاری كەمیان لەو ریگەیەدا لێ دەگیرا، بەهۆی كەم بوونی سیگارەكان رادەستی دادگا نەدەكران، بەڵكوو تەنیا سیگارەكەیان لێ دەستاندن و ئازادیان دەكردن. ئەویش چەندین جار دوای گیرانی سیگارەكانی ئازاد كرابوو، بەڵام دەست بەتاڵ رووی لە ماڵەوە كردبۆوە. جارێك لە جاران كە هێندێك زیاتر سیگاری پێ دەبێت، لە یەكێك لە ویستگەكانی سەربازی جادەی نێوان پیرانشار - مەهاباد لەلایەن سەربازانەوە گیراوە و شەوێ لە ژوورێكی تاكەكەسیدا راگیراوە. هەمان شەو، دوازدە كەس لە فەرماندە و سەربازەكان، تا بەیانی دەستدرێژیان كردووەتە سەری. تەنیا بە تاوانی هەڵگرتنی چەند بۆكس سیگار، ژنێك ڕووبەڕووی دەستدرێژی ببوویەوە و رۆژی دواتریش هەڕەشەی لێكرابوو كە هیچ نەڵێت و ئەگەر شتێكیشی گوتبا، بێگومان دادگا وەڵامی نەدەداوە، وەك چۆن گەلێك جاران شتی لەم جۆرە رووی داوە و دادگای حكوومەتی ئیسلامیی ئێران هەرگیز ئامادە نەبووە هێزەكانی خۆی بە تاوانبار بناسێنێت.
ئەم ژنە، خۆی بە كەوشێكی شڕ و دڕ شووبهاندبوو و گوتبووی: : دەستدرێژیان كردە سەرم و كردیانم بە كەوشێكی شڕ و دڕ... بۆ وەدەست هێنانی لەتە كاغەزێكی چڵكن بە ناوی پارە و تێر كردنی زگی خۆم و منداڵەكانم، بوومە پێڵاوی شڕ و دڕ... تف لەو ژیانە.
بیرم لە یەكەمین رۆژەكانی چوونی خۆم بۆ پیرانشار دەكردەوە. ئەو ژنە وەبیر دەهێنمەوە كە سەربازەكە بە زۆری دەیهەویست لە مینی بووسەكە دایبەزێنێ و ئەویش دانەدەبەزی. ئەگەر دابەزیبا، چی بەسەر دەهات؟ بۆ چركەیەك هەست بە خۆشی دەكەم بەهۆی ئەوەی كە منیش هاودەنگی ژمارەیەك لە خەڵكانی ناو مینی بووسەكە، دەنگی ناڕەزایەتیم لە بەرامبەر ئەو سەربازە دەربڕیبوو تا ئەوەی كە بە ناچار ئاخری لە كۆڵی ئەو ژنە هەژارە بۆوە. بەڵام دیسان خەم و خەفەت دامدەگرێتەوە. بیر لەوە دەكەمەوە كە ژنانی دیكە چی؟ یان هەمان ژن و كەڕەتەكانی دیكەی هاتوچۆ كردن لەم ڕێگایەدا چی؟ بیر لەو خەڵكانە دەكەمەوە كە هەر ئان و سات لەسەر سنوورەكان یان لەناو جادەكان، بە شەو یان بە رۆژ، رەنگە بدرێنە بەر دەستڕێژی گوللە و خوێنیان دەڕێژێ، هەروەها بیر لەو منداڵانە دەكەمەوە، كە باوكیان لە ماڵ بۆ كاسبی چۆتە دەرێ و رەنگە چەندین شەو و رۆژ جارێك یەكتر نەبینن، باوكیان دەكوژرێ، یان دەگیرێت و دەكەوێتە زیندان و كەس نیە ببێتە سەرپەنایان... بۆ چەند ساتێ‌ سیمای یەكێك لەو منداڵانە بهێننە بەرچاوی خۆتان...!