تێکدان و شکاندنی کێلی گۆڕی دوکتور مەسعوود گوڵزاری لە شاری تاران

کێلی گۆڕی دوکتور مەسعوود گوڵزاری پەیرەوی ئایینی یارسان لە شاری تاران، لەلایەن کەس یان کەسانێکی نەناسراوە شکێندراوە.

سەرچاوەیەکی ئاگادار لەو بارەیەوە بە ئاژانسی کوردپا ڕایگەیاند: "ڕێکەوتی ١١ی دێسامبر لەلایەن کەس یان کەسانێکی نەناسراوەوە، ئەو بەشەی کە نووسراوە "ئەوەڵ یار و ئاخر یار"، شکێندراوە".

ئەو سەرچاوەیە هەروەها ئەوەشی خستەڕوو، ئەم هەوڵە ئەگەری هەیە لەلایەن کەسانی دەمارگرژ و توندڕەوەکانی حکوومەتی ئێران، بە مەبەستی بێڕێزی بە ئایینەکانی دیکە بە تایبەت ئایینی یارسانی کرابێت.

ئەو سەرچاوەیە هەروەها دەڵێت: "بنەماڵەی ئەو دوکتورە یارسانییە، لە ترسی دووبارە تێکدانەدان و بێڕێزیکردن بەو لێکۆڵەرە یارسانییە، لە دووبارە نووسینەوەی "ئەوەڵ یار و ئاخر یار" لە سەر کێلی گۆڕەکەی، خۆیان بواردووە".

دوکتور مەسعوود گوڵزاری لەدایکبووی شاری تەورێزە و دوایی گۆڕینی ئایینی خۆی لە شیعەوە بۆ ئایینی یارسانی و لێکۆڵێنەوە لە سەر ئایینی یارسانی، چەندین بەرهەمی لێکۆڵێنەوەی لەو بوارەدا هەیە و مانگی گەلاوێژی ئەمساڵ لە تەمەنی ٨٦ ساڵیدا، لە شاری تاران کۆچی دوایی کرد.