ئاژانسی هەواڵدەریی کوردپا
ئەمیر عالیبەیگی پەرستاری نەخۆشخانەی "معاون"ی شاری سەحنەی پارێزگای کرماشان، لە لقی لێپرسینەوەی دادسەرای ئەو شارە، تۆمەتەکەی پێ ڕاگەیەندرا.
ئەو پەرستارە بە تۆمەتی "پڕوپاگەندە دژی نیزام لە ڕێگای دروستکردنی لاپەڕەی ئینیستاگرامی و بڵاوکردنەوەی هەواڵی ناڕاست لەو لاپەڕەیە" تاوانبار کراوە.
ئەمیر عالیبەیگی لە ڕێکەوتی ١٩ی سەرماوەز لە نەخۆشخانەی "معاون"ی شاری سەحنە، لەلایەن هێزە ئەمنییەتییەکانەوە دەسبەسەر و بۆ لێپرسینەوە ڕەوانەی گرتنگەی ئیدارەی ئیتلاعاتی کرماشان کرابوو.
مۆبایلی ئەو پەرستارە لە کاتی دەسبەسەرکرانیدا لەلایەن هێزە ئەمنییەتییەکانەوە دەستی بەسەردا گیرابوو.
ناوبراو بۆ ماوەی ٥ ڕۆژ لە ژووری تاکەکەسی ڕاگیرابوو و لەلایەن هێزە ئەمنییەتییەکانەوە، ئازار و ئەشکەنجە درابوو.
ئەمیر عالیبەیگی پاش تەواوبوونی ماوەی لێپرسینەوەکەی بۆ زیندانی دێزڵاوای کرماشان ڕاگوێزرابوو و دواتر بە دانانی بارمتە بە شێوەی کاتی ئازاد کرابوو.
