ئاژانسی هەواڵدەریی کوردپا
مامۆستا ڕەحمەت نسووحی تەمەن ٤٥ ساڵ، خەڵکی شاری مەهاباد، سەرەڕای تێپەڕینی ٧٢ ڕۆژ هێشتا لە دەسبەسەریدایە.
بەوتەی سەرچاوەیەکی ئاگادار، ئەو مامۆستا ئایینیە کوردە لە ماوەی دەسبەسەرکرانیدا، لە دەستپێڕاگەیشتن بە پارێزەر و چاوپێکەوتن لەگەڵ بنەماڵەکەی، بێبەری کراوە.
ئەو سەرچاوەیە هەروەها ئەوەشی خستەڕوو: مامۆستا ڕەحمەت پاش تێپەڕینی مانگێک بە سەر دەسبەسەرکرانیدا، ئیزنی یەکەم پێوەندیی تلفۆنی لەگەڵ بنەماڵەکەی پێ دراوە.
ئەو سەرچاوەیە هەروەها دەڵێت: ئەو مامۆستا ئایینیە لە گرتنگەی ئیدارەی ئیتلاعاتی ورمێ، لە ژێر لێکۆڵینەوەدایە و لە چارەنووسی هیچ زانیارییەک لەبەر دەستدا نییە.
مامۆستا ڕەحمەت نسووحی ڕێکەوتی ٢٨ی خەزەڵوەری ئەمساڵ، لە خاڵی پشکنینی بۆکان لەلایەن هێزە ئەمنییەتییەکانەوە دەسبەسەر کرابوو.
هەتا ئێستا لە هۆکاری دەسبەسەری و تۆمەتی وەپاڵدراو دژی ئەو مامۆستا کوردە، زانیارییەک لەبەر دەستدا نییە.
