ئاژانسی كوردپا: دارستانەكانی نزیك ئاوایی "حەسەن ئاوا" هەڵكەوتوو لە نیوان جادەی سەقز ـ مەریوان ئاگری تێبەر بوو.

بەپێی هەواڵی ئاژانسی هەواڵدەریی كوردپا، ئەو دارستانانە هەموو ساڵێك بێ‌ ئەوەی هۆكارەكەی دیار بێ‌ ئاگری تێبەر دەبێ‌ و ئەمساڵیش لەو دیاردەیە بێبەری نەبووە.

بە وتەی شایەتحاڵان پانتایی ئاگرەكە بە رادەیەك بووە كە لەلای رۆژهەڵاتی شاری مەریوانەوە ئاگرەكە دیارە و تەمێكی رەش ئەو ناوچەیەی داپۆشیوە.
لە رۆژانی رابردوودا لەلایەن كەسانێكی نەناسراوەوە سەیرانگای "مەلا قوبی"ی مەریوان، هەڵكەوتوو لە نێوان گوندەكانی "بەیەڵە و بەرقەڵا"ش ئاگری تێبەر دراوە و خەسار و زەرەرێكی زۆری سروشتی و ژینگەیی بەو ناوچەیە گەیشتووە.

لە ماوەی چەند ساڵی رابردوودا ئاگرگرتنی دارستان و لێڕەوارەكانی ناوچە كوردنشینەكانی ئێران و بەتایبەت دەورووبەری مەریوان، بۆتە دیاردەیەك و سروشتی كوردستانی خستۆتە مەترسییەوە.