مەلا شەریف مەحموودپوور پاش خوێندنەوەی بەیاننامەی مامۆستایانی پیرانشار لە پشتیوانی لە ناڕەزایەتییەکان دەسبەسەر کرا
ئێوارەی ڕۆژی دووشەممە ٣ی ڕێبەندان، مەلا شەریف مەحموودپوور، پێشنوێژی مزگەوتی ڕەسووڵەڵڵای پەسوێی شاری پیرانشار، لەلایەن هێزە ئەمنییەتییەکانەوە دەسبەسەر کرا و بۆ شوێنێکی نادیار، ڕاگوێزرا.
ئەو مامۆستا کوردە پاش خوێندنەوەی بەیاننامەی مامۆستایانی شاری پیرانشار و دەورووبەری لەهەمبەر لەسێدارەدانەکانی ئەم دواییانە، دەسبەسەرکرانی خۆسەرانە، ئەشکەنجەی زیندانییان و داسەپاندنی سزای کەیفەری بۆ ئەوان، بەبێ نیشاندانی حوکمی قەزایی لەلایەن هێزە ئەمنییەتییەکانەوە دەسبەسەر کراوە و بێڕێزی و بێحورمەتیی پێ کراوە.
ڕۆژی دووشەممە ٣ی ڕێبەندان، مامۆستایانی شاری پیرانشار و دەورووبەری بە بڵاوکردنەوەی بەیاننامەی موحارب و دانە پاڵی تۆمەتی بەغی لە ناڕازییەکان، کە هیچ چەشنە پێگەیەکی شەرعی و یاسایی نییە، داوایان لە فتوادەرەکانی شێعە کردووە کە بێدەنگی خۆیان لەمەڕ بارودۆخە قەیرانئاییەکی ئێران، بشکێنن.
مامۆستایانی شاری پیرانشار و دەورووبەری هەروەها خوازیاری ئازادیی تەواوی دەسبەسەرکراوەکان و داوای لێبوردن کردن لەوان و بنەماڵەکانیان و قەرەبووکردنەوەی ئەو زیانانە بوون کە لێیان کەوتووە.
