بەرپرسانی زیندانی سەقز خۆراکی زیندانییانیان کەم کردووەتەوە

بەرپرسانی زیندانی سەقز بو گوشار خستنە سەر زیندانییانی هەڵاتوو لە زیندانی ئەو شارە، خۆراکی زیندانییانیان کەم کردووەتەوە.

سەرچاوەیەکی ئاگادار لە زیندانی سەقز بە ئاژانسی کوردپای ڕاگەیاند: "پاش هەڵاتنی زیندانییانی زیندانی ئەو شارە، بەرپرسانی زیندان، سەرەڕای کەمکردنەوەی ژەمە خۆراکی زیندانییان، تەنانەت هەر دوو کەس یەک پۆرس خۆراکیان لە ژەمەکان پێ دەدەن".

ئەو سەرچاوە ئاگادارە هەروەها ڕایگەیاند: "جیا لە کەمکردنەوە خۆراکی زیندانییان، تەنانەت بەرپرسانی زیندان، ئاوی کوڵیو بۆ چایی بە زیندانییەکان نادەن و زۆربەی ژەمەکان زیندانییان چاییان نییە".

ئەو سەرچاوەیە زیادی کرد: "بەرپرسانی زیندان، کڕینی شتومەک لە بووفەیان بۆ زیندانییانی هەڵاتوو، کەم کردووەتەوە".

سەرچاوەی کوردپا هەروەها ناوی ئەو ٥ کەسەی کە مەحکووم کراون بە یارمەتیدانی هەڵاتنی زیندانییەکان ئاشکرا کرد کە بەم چەشنەیە: "ئەسلانی، دێهقان، عارف عیساپوور، عەبدی ‌پوور و ئەفسەر نیگەهبان محەممەدی".

هەتا ئێستا حوکمی ئەو ٥ کەسە بۆ ئاژانسی کوردپا ڕوون نەبووەتەوە.

حەوتووی ڕابردوو، بەرپرسی ڕێکخراوی دادوەریی هێزە چەکدارەکانی پارێزگای سنە، باسی لە مەحکوومکردنی ٥ زیندانی بە تاوانی یارمەتیدانی زیندانییان هەڵاتوو لە زیندانی سەقز کرد.