Sibêdeha roja Çarşemî 24`ê Xakelêwe, kolberek Kurd ê bi navê “Mihemed Mewlûdî” xelkê bajarê Baneyê bi sedema teqeya hêzên leşkerî yên hikûmetî li ser sînorê “Hengejal” ê wî bajarî hate birîndarkirin.
Roja Duşemî 22`ê Xakelêwe, welatiyek Kurd ê bi navê “Seyîd Ezîz Ehmedî” kurê Seyîd Rehman û xelkê bajarê Pîranşehrê, bo îdareya Îtila`ata wî bajarî hate gazîkirin û lêpirsîn digel navbirî hate kirin.
Roja Yekşemî 21`ê Xakelêweyê, “Kiyûmers Letîfî” çalakvanê medenî û wanebêjê zimanê Kurdî ji girtîgeha bajarê Sineyê bo girtîgeha îdareya Îtila`ata wî bajarî hate veguhastin.
Di heyama çend rojên derbasbûyî de, sê welatiyên Kurd ên bi navên “Ehmed Peyxamî, Hadî Husênzade û Mihemed Azerexş” xelkê “Nelus”a bajarê Şinoyê, bi danîna barimteyê ji îdareya Îtila`ata wî bajarî hatine azadkirin.
Di heyama çend rojên derbasbûyî de, du welatiyên Kurd ên bi navên “Îbrahîm Husênî” (bav) û “Selahedîn Husênî” (kur), xelkê gundê “Aliyavê” yê girêdayê bajarê Şinoyê, bi pêbendên elektironîkî ji girtîgeha wî bajarî hatine azadkirin.
“Selah Azadî”, ji çalakvanên sinfî yên mamostayên bajarê Merîwanê bo dadgeha Giştî û Şoreşê ya wî bajarî hate gazîkirin.
Sê welatiyên Kurd ên bi navên “Mihemed Fedewî, Mihemed Mehcûr û Rehmetullah Salihiyan Yazîbilaxî” xelkê gundê “Milqerenî û Yazîbilax” yên girêdayê bajarê Seqizê, li girtîgeha bajarê Sineyê hatine ragirtin û qedera wan nexûya ye.
Welatiyek Kurd ê bi navê “Ebdulvahid Ebaszade” temen 35 sal û kurê Osman ji aliyê dadgeha Şoreş a bajarê Seqizê ve, bi serokayetiya dadwer “Ekber Mîrzayî” bi 3 meh girtîgeha te`izîrî hete cezadan.
Roja Şemî 20`ê Xakelêweyê, du welatiyên Kurd ên bi navên “Rêbîn Rîşî û Ramîn Rîşî” xelkê bajarê Baneyê, ji aliyê hêzên ewlehî ve hatine binçavkirin û piştre bo cihek nexuya hatine veguhastin.
Qedera 5 welatiyên Kurd ên bi navên “Refîq Pizîşkî, Bêhzad Pizîşkî, Kerîm Pizîşkî, Se`îd Reşîdî û Cemal Murwetî” xelkê bajarê Baneyê, li girtîgeha bajarê Sineyê nerohn e.
Ajansa Nûçegihandinê ya Kurdpa
