ئاژانسی کوردپا: هێزە ئینتزامییەکانی حکوومەتی ئیسلامیی ئێران هاووڵاتییەکی کوردیان لە سەر رێگای پیرانشار – مەهاباد کوشت.

بەپێی هەواڵی ئاژانسی هەواڵدەریی کوردپا، رێکەوتی ١٢ی سەرماوەز هێزە ئینتزامییەکانی حکوومەتی ئیسلامیی ئێران لەسەر رێگای پیرانشار – مەهاباد لە شوێنێک بە ناوی "سەری مەیدان" بۆسە بۆ ماشێنی هاووڵاتییەکی کورد بە ناوی "ئیبراهیم جیهان ئارا" دادەنێن و وێڕای راگرتنی ماشێنەکەی دەیدەنە بەر دەستڕێژی چەکەکانیان و گیانی لێ دەستێنن.

سەرچاوەیەکی نزیک لەو رووداوە بە ئاژانسی هەواڵدەریی کوردپای راگەیاند: هێزە ئینتزامییەکان ئەو هاووڵاتییە کوردەیان تەنیا بە گومانی کڕین و فرۆشتنی مەشرووباتی ئەلکولی و لەبەر چاوی ٢ کوڕی خۆی کوشتووە.

ئەو هاوڵاتییە کوردە ناوی "ئیبراهیم جیهان ئارا" تەمەن ٥٠ ساڵ و لەدایک بووی ئاوایی "هەنگاوێ"ی سەر بە ناوچەی پیرانشار و لە پیرانشار نیشتەجێ بووە.

هەرەوەها سەرچاوەکە ئاماژەی بەوەشدا هەتا ئێستا تەرمی ئەو هاووڵاتییە لە نەخۆشخانەی پیرانشار راگیراوە و رادەستی بنەماڵەکەی نەکراوەتەوە.