زیندانی ئێڤین؛ موژگان کاووسی بەهۆی نەخۆشیی برادی کاردی و دابەزینی زەختی خوێن زەجر دەکێشێت

موژگان کاووسی، نووسەر و لێکۆڵەری کوردی بەندکراو لە زیندانی ئێڤین بەهۆی تووشبوونی بە نەخۆشیی برادی کاردی (هێواشیی لێدانی دڵ) و دابەزینی زەختی خوێن، بۆ ماوەی چەندین مانگە کە خوازیاری تاوتوێکردنی پزیشکی یاسایی لەمەڕ نەمانی تاقەت و توانای ناوبراو بۆ تێپەڕاندنی درێژەی حوکمەکەی بووە، بەڵام سەرەڕای ناجێگیربوونی بارودۆخی تەندروستیی ناوبراو لە ماوەی دوو حەوتووی ڕابردوودا، هەتا ئێستا لەلایەن بەرپرسانی پەیوەندیدارەوە بە نیسبەت ئەم پرسە هیچ بەدواداچوونێک ئەنجام نەدراوە و ئەمەش نیگەرانیی زۆری بنەماڵەی موژگان کاووسیی لێ کەوتووەتەوە.

سەرچاوەیەکی ئاگادار لە پەیوەندی لەگەڵ ڕاگواستنی موژگان بۆ یەکێک لە زیندانەکانی کەرەج، بە کوردپای ڕاگەیاند: "بەرپرسانی زیندانی ئێڤین لە ڕێگەی پەیوەندییەکی تەلەفوونیدا لەگەڵ ناوبراو ڕایانگەیاندووە کە بەپێی هەندێک لەبەرچاوگرتن و دژایەتیکردنی دادستانی تاران، ئەم ڕاگواستنەوە ئەنجام نەدراوە و داوایان لەو نووسەرە کوردە کردووە کە داواکارییەکی کەسی لەمەڕ ڕاگواستنی بۆ زیندانی شاری نەوشەهر جێبەجێ بکات".

ئەو سەرچاوە ئاگادارە هەروەها وتوویەتی: "بەلەبەرچاوگرتنی هەڵسوکەوتی نەشیاوی دادستان و دادوەری ئیجرای ئەحکامی شاری نەوشەهر، لە ڕەوتی ڕاگواستنی پێشین و ئەگەری ڕوودانی کێشەگەلێک لەمەڕ ئامادەبوونی موژگان لە زیندانی نەوشەهردا، ناوبراو لەگەڵ ئەم داواکارییە دژایەتیی کردبوو".  

ڕۆژی چوارشەممە ٢٠ی گەلاوێژ، موژگان کاووسی، نووسەر و لێکۆڵەری کورد پاش کۆتایی ماوەی مەرەخەسییەکەی، گەڕایەوە بۆ زیندانی ئێڤین.

بە وتەی سەرچاوەیەکی ئاگادار، پاش ئەنجامی قۆناغەکانی دادگایی ئەو چالاکە کوردە بەپێی بڕیاری بەرپرسانی زیندانی ئێڤین، ناوبراو بۆ یەکێک لە زیندانەکانی پارێزگای ئەلبۆرز ڕادەگوێزرێت.

ڕۆژی شەممە ٩ی گەلاوێژ، لقی ٢٨ی دادگای پێداچوونەوەی مازەندەران حوکمی ڕاگواستنی موژگان کاووسیی بۆ یەکێک لە زیندانەکانی پارێزگای ئەلبۆرز و نزیکترین زیندان بە شوێنی نیشتەجێبوونی، دەر کردووە.

ڕۆژی چوارشەممە ٣٠ی پووشپەڕ، ئەو نووسەرە بەندکراوە لە بەندی ژنانی زیندانی ئێڤین، پاش تووشبوونی بە ڤایرۆسی کۆرۆنا هاتە مەرەخەسی و مەرەخەسیی ناوبراو دیسانەوە درێژ کرایەوە.

ئێوارەی ڕۆژی سێشەممە ٢٢ی پووشپەڕ، موژگان کاووسی بەپێی داواکاریی خۆی لەمەڕ ڕاگواستن (بەلەبەرچاوگرتنی ئەگەری نیشتەجێبوون هەم لە تاران و هەم لە نەوشەهر) لە زیندانی ئێڤین بۆ نەوشەهر ڕاگوێزرا. پاش تێپەڕاندنی شەو لە گرتنگەی ناجای نەوشەهر، بەیانیی ڕۆژی چوارشەممە ٢٣ی پووشپەڕ ناوبراو ڕەوانەی دادگای نەوشەهر کرا تاکوو بە بڕیاری بەرپرسانی قەزایی ئەو شارستانە بۆ تێپەڕاندنی ماوەی حوکمەکەی بۆ زیندانی نەوشەهر ڕاگوازرێت بەڵام بەهۆی هاوئاهەنگی‌نەکردنی بەرپرسانی زیندانی ئێڤین لەگەڵ بەرپرسانی قەزایی نەوشەهر لەمەڕ ڕاگواستنی موژگان کاووسی بۆ زیندانی نەوشەهر، بەبێ هیچ هەوڵێک بۆ زیندانی ئێڤین گەڕیندراوەتەوە.

موژگان کاووسی، ڕۆژی یەکشەممە ٢٦ی بانەمەڕ، لە ناڕەزایەتی دەربڕین بەنیسبەت هەڵسوکەوتی نادادپەروەرانە و هەڵاواردنی بەرپرسانی زیندانی ئێڤین لە دانی مەرەخەسی بە زیندانییان لە پەیکی چوارەمی کۆرۆنا، دەستی دابووە مانگرتنی سنووردار.

پێشتر، شۆرای ئینزباتیی زیندانی ئێڤین ئەو نووسەرە کوردەی پاش مانگرتنی لە خواردن لەمەڕ دژایەتی لەگەڵ مەرەخەسییەکەی، لە مافی مەرەخەسی بێبەری کردبوو.

 ئەو نووسەرەی خەڵکی کەلاردەشتی مازەندەران، ڕۆژی سێشەممە ١١ی خەرمانانی ٩٩، بەهۆی جێبەجێنەکردنی داخوازییەکانی وەکوو مەرەخەسی و هەڵاواردنی ڕەگەزی بە نیشانەی ناڕەزایەتی مانی لە خواردن گرتبوو.

ڕۆژی چوارشەممە ٢ی ڕەزبەری ٩٩، موژگان کاووسی نووسەر و لێکۆڵەری کوردی یارسانی لە گرتووخانەی ئێڤین، پاش ڕەوانەکردنی بۆ نەخۆشخانەی "تاڵقانیـ"ـی تاران بۆ پشکنینی پزیشکی لە سەر داوای دوکتورەکان، کۆتایی بە مانگرتنەکەی خۆی هێنا.

ئەو نووسەرە کوردە پاش تێپەڕاندنی ١ مانگ زیندانیی کەیفەری لە زیندانی نەوشەهر، بۆ درێژەی ماوەی زیندانیبوونەکەی ڕەوانی زیندانی ئێڤین کرا.

ڕۆژی سێشەممە ٣٠ی بانەمەڕی ٩٩، "موژگان کاووسی" کە به ٧٦ مانگ و ١٥ ڕۆژ زیندان مەحکووم کرابوو، بەپێی حوکمی "تەجمیع"، ٣٦ مانگی ئەو حوکمە جێبەجێ دەکرێت و بۆ تێپەڕاندنی حوکمەکەی دەسبەسەر کرا

ڕۆژی هەینی ٢٦ی بانەمەڕی ٩٩، "موژگان کاووسی" لە گرتە ڤیدیۆیەکدا باسی لە حوکمی دەسبەسەرکرانی بە جێگای بانگهێشتنامە بۆ جێبەجێکردنی حوکمی زیندانیبوونەکەی کرد.

حوکمی ٦٩ مانگ زیندانیی ئەو نووسەرە کوردە لە دادگای پێداچوونەوەی پارێزگای مازەندەران بۆ ٧٦ مانگ و ١٥ ڕۆژ زیندانی زیادی کرد کە بەپێی یاسای تەجمیع ٣٦ مانگی ئەو حوکمە جێبەجێ دەکرێت.

دادگای ئینقلابی شاری نەوشەهر بەبێ هیچ بانگهێشتنامە و ئاگادارییەک حوکمی "ممنوع‌الخروجـیـ"ـی بەسەر ئەو چالاکە کوردە یارسانییە سەپاندبوو.

ڕۆژی پێنجشەممە ٢٨ی سەرماوەزی ٩٨، ئەو نووسەر و چالاکە کوردە ڕەوانەی دادگای ئینقلابی نەوشەهر کرا و دادگا ناوبراوی بە ٦٩ مانگ زیندان مەحکووم کرد و پاش سەپاندنی حوکمی دادگا بە دانانی بارمتەی ١٠٠ ملیۆن تمەنی بەشێوەی کاتی ئازاد کرابوو.

دادگای ئینقلابی شاری نەوشەهر ئەو نووسەرە کوردەی بە تۆمەتی "ئەندامبوون لە حیزبە کوردییەکانی ئۆپۆزیسیۆنی حکوومەتی ئێران"، بە ٣٣ مانگ زیندان، "هاندانی خەڵک بۆ تێکدانی نەزمی گشتی" بە ٣٠ مانگ زیندان و "پڕوپاگەندە دژی نیزام" بە ٦ مانگ زیندان مەحکووم کرد.

ڕۆژی دووشەممە ٢٧ی خەزەڵوەری ٩٨، هێزە ئەمنییەتییەکان هێرشیان کردبووە سەر ماڵی ئەو نووسەرە کوردە و بەبێ بەڵگەی یاسایی ناوبراویان دەسبەسەر کردبوو.

ڕۆژی سێشەممە ١٩ی سەرماوەزی ساڵی ٩٨، ئەو چالاکە کوردە بە بڕیاری دەسبەسەریی کاتی بۆ زیندانی نەوشەهر ڕاگویزرابوو.