ئاژانسی کوردپا: دوو هاووڵاتیی کرماشانی، لە دوو شوێنی جیا جیای نێو شاری کرماشان و بە بڕیاری دەزگای قەزایی حکوومەتی ئیسلامیی ئێران لەبەر چاوی گشتیی خەڵک لە سێدارە دران.

بەپێی راپۆرتی ئاژانسی هەواڵدەریی کوردپا، ئەمڕۆ چوارشەممە رێکەوتی ٦ی رەشەمە لە گۆرەپانی ئازادیی کرماشان و گەڕەکی (جەعفەرئاوا)ی کرماشان حوکمی لەسێدارەدانی دوو کەس بەڕێوەچوو.

دادستانی گشتیی کرماشان بە هەواڵدەرییەکانی راگەیاندووە، کە ئەو دوو کەسە بە "تاوانی" "دەستدرێژیی جنسی" و فیلم هەڵگرتن لە کردەوەکەیان، لەسێدارە دراون.

هەتا ئێستا شوناسی ئەو دوو کەسە، بۆ ئاژانسی هەواڵدەریی کوردپا روون نەبۆتەوە.

ئەو دوو کەسە لەلایەن دادگەی "عمومی و انقلاب"ی کرماشانەوە حوکمی لەسێدارەدانی بۆ برابوویەوەو ئەو حوکمەش لەلایەن دیوانی بالای وڵاتی ئێرانەوە پشتراست کرابوویەوە.

مەلەکی، داستانی گشتیی کرماشان ئەو کردەوەیەی لە راستای هەڵسووکەوت لەگەڵ "ارازل و اوباش" وەسف کردووەو گوتویەتی کە لەگەل ئەو کەسانە توندترین شیوەی هەڵسووکەوت دەکەن.

ئا: ئارام. ح

لە کاتێکدا بەرپرسان و ناوەندە حکوومەتییەکانی ئێران، ئامانجی خۆیان لە بەرێوەبردنی سزای لەسێدارەدان لەبەر چاوی خەڵک بۆ بوونە دەرسی عیبرەتی خەڵک دەگەرێننەوە، بەڵام بە بڕوای چالاکانی کۆمەڵایەتی ئەم کارە بە پەرەپێدان و برەودان بە توندوتیژی و ئاسایی کردنەوەی توندوتیژی لە کۆمەڵگەدا لە قەڵەم ئەدەن.