ئاژانسی هەواڵدەریی کوردپا
ئاژانسی كوردپا: زبڵ و پاشماوەكانی پادگانێكی نیزامیی لە ئوستانی كرماشان، فرێدەدرێتە ناو دارستان و لێڕە وارەكانەوە.
بەپێی هەواڵی گەیشتوو بەئاژانسی هەواڵدەریی كوردپا، لێڕەوارەكانی بەڕووی شارستانی ئیسلام ئاباد بۆتە شوێنی زبڵ و پاشماوەكانی پادگای نیزامیی " سەلمانی فارس"ی ئەو شارستانە.
ئەو پادگانە نیزامییە سەر بە هێزی زەمینی ئەرتشە و لەجادەی ئاوایی " كسان"و لەنزیک چیای "قەڵاجە" هەڵكەوتووەو بەوتەی سەرچاوەیەكی ئاگادار، نزیک بە ٤ هەزار سەرباز لەو پادگانە دان.
رۆژانە دوو ماشێنی بارهەڵگری زبڵ و پاشماوە فڕێدەدرێتە ناو دارستانەكانی دەورووبەری ئەو پادگانە و بەشێكی و فەرماندە نیزامییەكانیش لەو پیس كردنەی ژینگەیە ئاگادارن.
پادگانەكە لە ١٥ كیلۆمیتریی باشووری شارستانی ئیسلام ئاباد هەڵكەوتووە و بە یەكێک لە بنكە نیزامییەكانی لەشكری ٨١ی كرماشان دێتە ئەژمار.
هێندێک لە سەرچاوە ناوچەییەكانیان باسیان لەوە كردووە، فیلمی فڕێدانی ئەو پاشماوانە بە فەرمانداری ئەو شارستانە دراوە و لێژنەیەک بەمەبەستی لێكۆلینەوە و بەدواداچوون رەوانەی شوێنەكە كراوە.
بەپێی ئامارە فەرمییەكان، ئوستانی كرماشان، خاوەنی ٨٢٢ هەزار هێكتار لێڕەواری سروشتییە كە شارستانی ئیسلام ئاباد ٣٣%ی ئەو لێڕەوارانە بۆ خۆی تەرخان كردووە.
هەر دار بەڕوویەک ماوەی زەمەنیی٧٠ هەتا ١٥٠ ساڵ دەخایەنێت، کە گەشە بکات و گەورە بێت.
