ئاژانسی هەواڵدەریی کوردپا
ئاژانسی كوردپا: ژیان و كەسایەتیی مامۆستا پیرەمێردی شاعێر لەلایەن فواد مەجید میسری هونەرمەندی شاری سلێمانییەوە دەكرێتە درامایەكی تەلەفیزیۆنی.
ئاژانسی هەواڵدەریی كوردپا، بۆ زانیاریی زیاتر لە پێوەندییەكی تەلەفۆنیدا چەند پرسیارێكی رووبەڕووی فواد مەجید میسری كردەوە و ناوبراویش وتی: "ماوەیەكی دیكە سیناریۆی ژیان و كەسایەتیی مامۆستا پیرەمێرد شاعێری ناوداری كورد تەواو دەبێت و وتیشی، بەو هۆیەی كە پیرەمێرد لە سەردەم و بارودۆخێكدا ژیاوە كە هەستیار بووە و زۆر رووداو لە مێژووی كورددا روویان داوە كە بەهۆی ئەوەی خۆی لە زۆریاندا راستەوخۆ بەشداریی كردووە و هەروەها بەهۆی بەرزیی باری ئەدەب و شاعێرییەتی ناوبراو من بۆ ئەم درامایە ئەم پیرەمێردی نەمرم دیاری كردووە".
ئەو هونەرمەندە راشیگەیاند، لایەنێكی دیكەی ژیانی پیرەمێرد كە لەم درامایەدا دەخرێنە روو كەسایەتیی ئەدەبی و شاعێرییەتی، چونكە پیرەمێرد كەسێكە لە بوارەكانی شێعر، پەند، وتار، رۆژنامەنووسی و هەروەها شانۆدا چالاك بووە.
وتیشی: ئەم كارەی كە من دەیكەم لەگەڵ گێڕانەوەی دەقێكی مێژووییدا جیاوازی هەیە، چونكە ئەمە بواری هونەر و تەكنیكە بێگومان و فانتازیا و خەیاڵی تێكەڵ دەبێت و من دەقاودەق دەقێكی مێژوویی ناگێرێمەوە، بەڵام بۆ كامڵ كردنی كەڵك لە مێژوو وردەگرم.
فواد مەجید میسری هونەرمەندی دەرهێنەر و سیناریست ئەوەشی خستە روو ئەم درامایەی كە من لەسەر پیرەمێرد ئەنجامی دەدەم، تەنیا بڕگەیەكە لە ژیانی، واتە ساڵی ١٩٢٥ هەتا١٩٥٠ی زایینی لەخۆ دەگرێت و تێیدا بارودۆخی سیاسی، كۆمەڵایەتیی ئەو زەمەنە مێژووییەی كورد تاوتوێ دەكرێت.
لە بەشێكی دیكەی لێدوانەكەیدا بۆ كوردپا وتیشی: "پاش كۆتایی هاتنی سیناریۆكە دەبێ ئامادەكاری بۆ هەڵبژاردنی ئەكتەر، رۆڵگێڕ و ستاڤی كارە هونەرییەكان بكرێت و دواتر وێنەگرتنی دەست پێدەكات، هەڵبەت پێویستی بە بوودجەیەكی زۆرە و هەر ناوەند و سەنتەرێكی هونەری یان كەناڵێكی تەلەفیزیۆنی بوودجەكەی بدات، ئەو درامایەی بۆ ساز دەكرێـت.
پێشتر لەم بارەوە ساڵی ١٩٧٩ ژیان و كەسایەتیی "جەماڵ عیرفان" كەلە سەردەمی حكوومەتی شێخ مەحمووددا تیرۆر كراوە، كردۆتە شانۆ و بڵاوی كردۆتەوە و ساڵی ١٩٨٠ی زایینیش ژیان و كەسایەتیی "حەلاج"ی كردۆتە شانۆ.
ـ تەوفیق مەحموود حەمزە، ناسراو بە "پیرەمێرد" و "حاجی تەوفیق بەگ" ساڵی ١٨٦٧ لە شاری سلێمانی لەدایك بووە.
ـ شاعێر و رۆژنامەوانی ناوداری كورد كەسێك بووە كەلە بووژانەوە و زیندوو كردنەوەی یادەكانی نەورۆز لە سلێمانی دەوری بەرچاوی گێڕاوە.
ـ لە سەردەمی شێخ مەحموودی نەمردا نێردراوەتە ئەستەمبۆڵ و كۆلیژی یاسای خوێندووە و لە دەوڵەتی عوسمانیدا چەند پۆستێكی ئیداری و سیاسیی پێ سپێردراوە و پاش تێكچوونی شۆڕشی شێخ سەعیدی پیران گەڕاوەتەوە سلێمانی.
ـ رۆژنامەمەكانی ژین و ژیان بەرهەمی تێكۆشانی رۆژنامەوانیی پیرمێردن.
ـ ساڵی ١٩٥٠ كۆچی دوایی كردووە.
ـ فواد مەجید میسری، ساڵی ١٩٤٧ لە شاری سلێمانی لەدایك بووە.
ـ لە ساڵی ١٩٧٠وە هەتا ساڵی ١٩٩٠ زیاتر لە دە دەقی شانۆیی و رەخنەیی نووسیوە كە بڵاو كراونەتەوە.
ـ چەندین كتێبی لە عەرەبییەوە وەرگێڕاوەتە سەر زمانی كوردی كە دوو بەرهەمیان هی كەماڵ مەزهەر ئەحمەد مێژوونووسی كوردە و چەند كتێبی دیكەشی لە بواری سیاسی و فكری چەپەوە نووسیوە و بڵاو كراونەتەوە.
- درامای تەلەفیزیۆنیی "خانەکەی "حاجی ئاغا" لە نووسین و دەرهێنانی فواد مەجید میسری ماوەیەک لەمەوپێس لە کەناڵی کوردستاتەوە بلاو کرایەوە.
