سەقز؛ چێشتخانەی "ڕۆمانۆ" بەپێی یاسای بەرەوڕووبوونەوە لەگەڵ "بێ حیجابی" داخرا
ڕۆژی یەکشەممە، ١٦ی بانەمەڕی ١٤٠٣، چێشتخانەی "ڕۆمانۆ" هەڵکەوتوو لە شاری سەقز بە فەرمانی "ئیدارەی چاوەدێریکردن بەسەر شوێنە گشتییەکانی فەرماندەیی ئینتیزامیی شاری سەقز" و بەپێی یاسای بەرەوڕووبوونەوە لەگەڵ "بێ حیجابی" داخرا.
بەپێی ڤیدیۆیەک کە لە داخرانی ئەم چێشتخانەیە بە کوردپا گەیشتووە، ئەم چێشتخانە هەتا ئاگادارکردنەوەی دوایی بە هۆی ڕەچاونەکردنی یاسای سەندیکایی و ئاییننامەی شوێنە گشتییەکان هەتا کاتێکی نادیار داخراوە.
هەروەها لە ڕاگەیەندراوی بەڕێوەبەرایەتیی ئەم چێشتخانەیەدا هاتووە، ئەم چێشتخانەیە دوابەدوای گەڵاڵەی گشتیی حیجاب و ڕەچاونەکردنی پرسی حیجاب داخراوە و ٥٠ کەس لە پێرسۆنێلی ئەم چێشتخانەیە بێکار کراون.
بە وتەی سەرچاوەیەکی ئاگاداری کوردپا داخرانی ئەم چێشتخانەیە ناڕەزایەتییی خەڵکی بەدواوە بووە و خەڵک لەسەر ئەو باوەڕەن کە کۆماری ئیسلامی لە بنەڕەتدا دژی هەر چەشنە شادی و خۆشییەکی خەڵکە.
چێشتخانەی "ڕۆمانۆ" یەکێک لەو چێشتخانانەیە کە بۆ گەشتیارەکان گرینگە و زۆربەی شەوان مووزیک و گۆرانی کوردیی تێدا بڵاو دەکرێتەوە.
